Isroil G‘azo sektoriga barcha kirish-chiqish punktlarini to‘liq yopganidan beri olti hafta o‘tdi. Bosh vazir Netanyaxuning gumanitar yuklarga ham taalluqli bo‘lgan mazkur qarori oqibatida anklavning oziq-ovqat zaxiralari deyarli tugab bo‘ldi. Mahalliy aholi va gumanitar tashkilotlarning ogohlantirishicha, falastinliklar uchun endi bombalar emas, ochlik asosiy xavfga aylangan.
Xon Yunisdagi qochqinlar lagerida yashayotgan 64 yoshli Rehob Axras shunday deydi:
“Biz urushdan omon chiqdik, havo hujumlaridan tirik qoldik. Ammo ochlikdan qutula olmaymiz — na o‘zimiz, na bolalarimiz”.
U oilasi bilan karton bo‘laklarini yoqib, bir dona loviya konservasini isitmoqda — bu ularning bor-yo‘g‘i. “Biz 13 kishimiz. Bitta konserva bilan nima qilamiz”? deydi u.
Nonvoyxonalar yopilgan, bozorlar esa bo‘shab qolgan
Avvallari aholi uchun bepul taom tarqatgan favqulodda yordam oshxonalarida uzun navbatlar yuzaga kelgan. Mahsulot zaxiralarining kamligi bois ular oziq-ovqat miqdorini keskin kamaytirishga majbur. Bozorlarda esa deyarli hech narsa qolmagan, borlari ham juda qimmat narxda sotilmoqda.
“Har kuni G‘azoda yangi tug‘ilgan chaqaloqlar va bolalar och holda uxlamoqda. Biz bu yerda chuqur ochlik bosqichiga tobora yaqinlashmoqdamiz,” dedi BMTning Falastinlik qochqinlar bo‘yicha yordam agentligi (UNRWA) vakili Juliette Touma vaziyatning naqadar og‘irligini ta'riflar ekan.
Norvegiya Qochqinlar kengashining G‘azodagi vakili Gavin Kelleherga ko‘ra, oziq-ovqat taqsimoti butunlay to‘xtash arafasida turibdi.
Reuters nashrining anklav aholisiga tayanib yozishicha, G‘azo bozorlarida oziq-ovqat narxlari quyidagicha o‘zgargan:
25 kg un — ilgari 6 dollar, hozir 60 dollar
1 litr yog‘ — ilgari 1,50 dollar, hozir 10 dollar
1 dona sardina konservasi — 5 dollar atrofida
Fransiyaning “Chegarasiz shifokorlar” tashkiloti bolalar, homilador ayollar va emizikli onalar orasida o‘ta og‘ir to‘yib ovqatlanmaslik holatlari kuzatilayotganini ma'lum qildi. Ko‘plab onalar o‘zlari ham ovqatlanmaganligi sababli farzandini emizolmayapti.
Nuseyratda yashovchi Neama Farjalla har kuni ertalab bir piyola guruch umidida bolalari bilan urush zonasida joylashgan bir oshxonadan boshqasiga boradi.
“Agar havo hujumidan o‘lmasak, ochlikdan o‘lamiz. Bolam “Ona, men sut ichmoqchiman” desa, yuragim eziladi,” deydi u.
Yahudiy davlati G‘azoda ochlik mavjudligini inkor qilib, insonparvarlik yordami go‘yoki HAMAS tomonidan o‘g‘irlanayotganini iddao qilgan.
“IDF (Isroil mudofaa kuchlari) siyosiy rahbariyat ko‘rsatmalariga binoan harakat qilmoqda. Biz yordamni terror tashkilotlari qo‘liga topshirmaymiz”, deyiladi bayonotda.
HAMAS esa, o‘z navbatida, bu kabi da’volarni rad etib, Isroilni ochlik omilidan harbiy qurol sifatida foydalanishda ayblagan.
Izoh (0)