Xalqaro jinoyat sudi Vengriyaning hibsga olish orderi chiqarilgan Isroil bosh vaziri Binyamin Netanyaxuning mamlakatga tashrifi munosabati bilan sud bilan hamkorlik qilishi shartligini ma’lum qildi.

Netanyaxuning tashrifiga kelsak, sud hibsga olish orderi chiqarilganidan so‘ng o‘zining standart tartib-qoidalariga amal qildi. Sud Vengriyaning XJS bilan hamkorlik qilish majburiyati saqlanib qolayotganini eslatadi, deydi sud matbuot xizmati jurnalistlarga bergan bayonotida.
2-aprel kuni Netanyaxu rasmiy tashrif bilan Vengriyaga keldi. Times of Israel nashrining yozishicha, bu Netanyaxuning 2024-yil noyabr oyida Xalqaro jinoyat sudi uni hibsga olish orderini chiqarganidan beri Yevropaga ilk safari hisoblanadi.
XJS Binyamin Netanyaxu va Isroilning sobiq mudofaa vaziri Yoav Galantni G‘azo sektoridagi ehtimoliy harbiy jinoyatlari uchun hibsga olish orderini chiqargan. Sud, shuningdek, o‘z fuqarolariga nisbatan order chiqarish bo‘yicha sud yurisdiksiyasiga e’tiroz bildirishga uringan Isroilning dalillarini rad etgan. Bundan tashqari, Isroil XJSning umuman Falastindagi vaziyat bo‘yicha ishlarni ko‘rib chiqish yurisdiksiyasiga ham e’tiroz bildirgan edi.
Vengriya bosh vaziri Viktor Orban 2024-yil noyabr oyida Netanyaxuni mamlakatga taklif qilish va Xalqaro jinoyat sudi qarori uning hududida amalga oshirilmasligini kafolatlash niyatida ekanini aytgandi.
Vengriya bosh vaziri ma’muriyati rahbari Gergey Guyyash Vengriya XJS nizomini ratifikatsiya qilmaganini, shu sababli Isroil bosh vaziri order bo‘yicha hibsga olinishdan cho‘chimasdan bemalol mamlakatga kelishi mumkinligini ta’kidladi.
Vengriya hukumati XJSdan chiqish to‘g‘risida qaror qabul qilgani ma’lum qilingandi.
Izoh (0)