Исроил хавфсизлик хизматлари Ғазо секторида ҲАМАС томонидан қурилган ерости туннел тармоғининг чорак қисми йўқ қилинганини маълум қилди. Бу ҳақда иброний тилдаги “Мако” нашри ҳукуматдаги манбаларга таяниб хабар берди.
Хавфсизлик расмийларига кўра, 2023 йил октябридан бери давом этаётган ҳарбий ҳаракатларга қарамай, Ғазо остидаги туннеллар тармоғининг 75 фоизи сақланиб қолмоқда. Бироқ Исроил аскарлари ҲАМАС жангчилари билан юзма-юз тўқнашувлар камайганини, улар туннел тизимлари орқали яширинаётганини билдирган.
Ерости шаҳри
2007 йилдан буён Ғазо ва Мисрнинг Синай ҳудуди орасида юзлаб контрабанда туннеллари қурилган. Улар орқали қурол, маҳсулотлар ва айрим ҳолларда ҳатто инсонлар ташилган. Миср ҳукумати 2011–2015 йиллар оралиғида хавфсизлик важи билан 2 мингдан ортиқ туннелни йўқ қилгани айтилади. Шунга қарамай, уларнинг катта қисми ҳануз сақланиб қолаётган бўлиши мумкин.
Исроил ҳарбийлари Ғазо жанубидаги Филаделфия йўлагини назорат қилишда давом этмоқда. 14 километр узунлик ва 100 метр кенгликдаги ҳудуд демилитаризация зонаси бўлиб, 1979 йилги Миср–Исроил тинчлик шартномасининг бир қисми ҳисобланади.
Яҳудий давлатининг мудофаа вазири Исроил Кац мазкур ҳудудда бир нечта туннелни ўз кўзлари билан кўрганини айтиб, Филаделфия йўлаги Ливан ва Сурия чегараларидаги каби хавфсизлик зонаси сифатида сақлаб қолинишини билдирган.
Бироқ расмийларнинг фикрича, ҲАМАС ҳаракати Ғазони Миср билан боғловчи туннеллар қуришда давом этмоқда. Исроил кучлари эса Филаделфия йўлагини назорат қилаётганига қарамай, бунга тўлиқ қаршилик кўрсата олмаяпти.
Фаластин Соғлиқни сақлаш вазирлиги маълумотига кўра, Исроил Ғазога зарбаларини қайта бошлаганидан буён камида 1 482 киши ҳалок бўлган. Уруш бошидан бери эса қурбонлар сони 50 мингдан ошган. Яна 10 мингдан ортиқ фаластинлик бедарак йўқолган ва ҳалок бўлган деб ҳисобланмоқда.
Изоҳ (0)