Shavkat Mirziyoyev 7-aprel kuni Toshkentda o‘tayotgan Parlamentlararo ittifoqning 150-yubiley assambleyasi yalpi majlisida nutq so‘zlab, Ukraina, G‘azo sektori va Afg‘onistondagi vaziyatga e’tibor qaratdi.
-BYQon30c.avif)
Prezident O‘zbekiston har qanday ziddiyat va qarama-qarshiliklarni faqat diplomatiya va tinch muzokaralar yo‘li bilan hal etishning qat’iy tarafdori ekanini yana bir bor ta’kidladi.
“Umid qilamizki, Ukraina atrofidagi vaziyat bo‘yicha boshlangan muzokaralar jarayoni o‘zining ijobiy natijasini, albatta, beradi”, dedi davlat rahbari.
Shavkat Mirziyoyev eng og‘riqli muammolarga xalqaro huquqning umume’tirof etilgan me’yorlari, Birlashgan Millatlar Tashkilotining nizomi va rezolyutsiyalari asosida yechim topish muhimligini aytdi.
“Jumladan, Falastin—Isroil nizosining yagona va adolatli yechimi ikki xalq uchun — ikki davlat tamoyilini ro‘yobga chiqarishdan iboratdir”, dedi prezident.
Shavkat Mirziyoyev qo‘shni Afg‘oniston masalasiga ham to‘xtaldi.
“Ushbu mamlakatning xalqaro maydonda yakkalanib qolishiga yo‘l qo‘ymaslik, amaldagi hukumat bilan konstruktiv muloqot o‘rnatish, Afg‘onistonga Markaziy Osiyo mintaqasining ajralmas qismi va yangi imkoniyatlar makoni sifatida qarash lozim, deb hisoblaymiz. Bu borada parlamentlarning ko‘magiga ishonamiz”, dedi O‘zbekiston yetakchisi.
Shavkat Mirziyoyev O‘zbekiston Birlashgan Millatlar Tashkilotini universal va muqobili yo‘q yagona global tuzilma sifatida e’tirof etishini ta’kidladi. Bu borada bosh kotib Antoniu Guterrishning mazkur xalqaro tashkilotni chuqur isloh qilish, uning salohiyatini oshirish bo‘yicha olib borayotgan tizimli sa’y-harakatlarini to‘liq qo‘llab-quvvatladi.
Davlat rahbari Yevrosiyo guruhining Ikkinchi jahon urushida qozonilgan G‘alabaning 80 yilligiga bag‘ishlangan bayonotini to‘la olqishladi.
Markaziy Osiyo tarixida ilk marotaba Toshkent shahrida Parlamentlararo ittifoqning 150-yubiley assambleyasi bo‘lib o‘tmoqda. 2024-yilning mart oyida Shveysariyaning Jeneva shahrida Parlamentlararo ittifoq bosh kotibi Martin Chungong va O‘zbekiston Oliy Majlis Senati raisi Tanzila Norboyeva o‘rtasida PIning 150-yubiley assambleyasini 2025-yil O‘zbekistonda o‘tkazish to‘g‘risida bitim imzolangandi. 30-yanvar kuni Oliy Majlis Senatida ushbu assambleyani o‘tkazish bo‘yicha tashkiliy qo‘mita yig‘ilishida Tanzila Norboyeva mazkur tadbir faqatgina parlamentarizm va barqaror rivojlanishning ijobiy tajribasi yuqori bo‘lgan mamlakatlardagina o‘tkazilishini ta’kidlagandi.
5-aprel kuni Parlamentlararo ittifoqning 150-yubiley assambleyasi Toshkent shahrida o‘z ishini boshladi. 6-aprelda Parlamentlararo ittifoqning 150-yubiley assambleyasining “Ijtimoiy taraqqiyot va adolat uchun parlament harakati” mavzusidagi birinchi yalpi majlisi bo‘lib o‘tdi.
Parlamentlararo ittifoq haqida
Parlamentlararo ittifoq 1889-yilda ta’sis etilgan bo‘lib, xalqaro tashkilotlar orasida yoshi eng ulug‘idir. Bu nufuzli tashkilot dunyo parlamentlarining yetakchi xalqaro organi sifatida mamlakatlarni o‘zida birlashtirgan. 1971-yildan buyon bosh qarorgohi Jenevada joylashgan.
A’zo parlamentlar va ularning deputatlari o‘rtasida yuksak qadriyatlarni ilgari suradigan ushbu tashkilot barcha millatlar o‘rtasida hamkorlik va muloqotni rag‘batlantirib kelmoqda. Ayni vaqtda tinch va hamjihat kelajakni ta’minlash uchun samarali qarorlar qabul qilish yo‘lida xizmat qilmoqda.
Izoh (0)