Turkiyaning Bursa shahri yaqinidagi Uludag‘ tog‘-chang‘i kurortidagi mehmonxonada kuchli yong‘in sodir bo‘ldi. Halok bo‘lganlar va jabrlanganlar bor. Bu haqda mahalliy Onedio nashri xabar bermoqda.
Ma’lum qilinishicha, yong‘in turistik faoliyat yuritish uchun sertifikati bo‘lmagani sababli mehmonlar qabul qilishdan to‘xtatilgan mehmonxonada ro‘y bergan. Voqea joyiga tezkor ravishda qutqaruv guruhlari yetib kelib, yong‘inni o‘chirishga kirishgan.
Dastlabki ma’lumotlarga ko‘ra, yong‘in oqibatida ikki kishi jarohat olgan, yana ikki kishini qutqarib qolishning iloji bo‘lmagan. Ulardan biri milliy chang‘i sportchisi Berkin Usta bo‘lgan.
Qayd etilishicha, yong‘in vaqtida binoda 12 kishi bo‘lgan.
21-yanvar kuni Turkiyaning yana bir tog‘-chang‘i kurorti — Kartalkaya mehmonxonasida ham yong‘in sodir bo‘lgan edi. Olov xonalardan birida chiqib, keyin butun binoni qamrab olgan. O‘nlab odamlar halok bo‘lgan.
Izoh (0)