Туркиянинг Карталкая тоғ-чанғи курортидаги меҳмонхонада 21 январь куни ёнғин содир бўлганди. Ҳодиса оқибатида ҳалок бўлганлар сони 80 кишига етди. Бу ҳақда Haberturk хабар берди.
Туркия ички ишлар вазири Али Ерликая 52 нафар қурбоннинг шахси аниқланганини маълум қилди. 45 нафар ҳалок бўлганларнинг жасади оилаларга етказилган. Қолганлари ҳозирча аниқланмаган. Ёнғин иши бўйича тўққиз киши, жумладан, меҳмонхона эгаси қўлга олинган.
Ёнғин 21 январга ўтар кечаси Болу провинциясидаги 12 қаватли ёғоч меҳмонхонада содир бўлди. Губернатор Абдулазиз Айдин ёнғин тўртинчи қаватдаги ресторан зонасида содир бўлгани ва бутун бинога тарқалганини айтган.
Ўша пайтда меҳмонхонада 234 нафар киши бўлган. CNN Турк нашрининг хабар беришича, фавқулодда вазият куни ўқувчиларнинг таътиллари туфайли меҳмонхона 80-90 фоизга тўлган.
“Хотиним куйган ҳидни сезди. Сигнал ишламади. Биз юқорига чиқмоқчи бўлдик, лекин аланга туфайли чиқа олмадик. Биз пастга тушиб, кўчага чиқдик. Юқори қаватдаги одамлар қичқирарди. Улар деразалардан чойшабларни чиқарганди”, дейди ижарачи Атакан Элкован.
Ёнғин сабаби ҳозирча аниқланмаган, тергов олиб борилмоқда, 22 январь Туркияда мотам куни деб эълон қилинган.
Шавкат Мирзиёев туркиялик ҳамкасби Ражаб Тоййиб Эрдўғонга тоғ-чанғи курортидаги ёнғин оқибатида кўплаб инсонлар қурбон бўлгани ва жиддий жароҳат олгани муносабати билан ҳамдардлик йўллади. Қардош Туркия етакчиси ва халқига чуқур таъзия изҳор этиб, давлат раҳбари марҳумларнинг оила аъзолари ва яқинларига сабр-тоқат ва бардамлик, жабрланганлар тез фурсатда соғайиб кетишини тилади.
Изоҳ (0)