Rossiyaning “Azimut” aviakompaniyasining Sochidan parvoz qilayotgan Sukhoi Superjet 100 samolyoti Turkiyaning Antaliya aeroportiga qo‘nganidan so‘ng yonib ketdi. Bu haqda Rosaviatsiya matbuot kotibi Artem Korenyako xabar berdi.
Hodisa 24-noyabr kuni sodir bo‘lgan. “Rosaviatsiya” rasmiysi yong‘in oqibatida samolyot yo‘lovchilari jarohat olmaganini aytgan. Layner komandiri yo‘lovchilarni shishiriladigan traplar orqali evakuatsiya qilishga ko‘rsatma bergan.
Jabrlanganlar yo‘qligi haqidagi ma’lumotni aviakompaniya ham tasdiqlagan. Turkiya Transport vazirligi ma’lumotlariga ko‘ra, samolyotda 95 kishi bo‘lgan. Antaliya aeroporti esa samolyotda 91 kishi bo‘lganini xabar qilmoqda.
Korenyakoning aytishicha, yong‘inini Turkiya aeroportining favqulodda-qutqaruv guruhi tezda o‘chirishga erishgan. Guvohlar avvaliga samolyotning dvigateli yongani, shundan so‘ng alanga boshqa joyga o‘tganini aytmoqda. Hozirda yong‘in o‘chirilgan.
Iyul oyida Superjet 100 Moskva viloyatida halokatga uchragandi
12-iyul kuni yo‘lovchisiz samolyot Moskva viloyatining Kolomensk tumanida halokatga uchragandi. Oqibatda bortkuzatuvchi va ikki uchuvchi halok bo‘lgan. Layner 2014-yilda chiqarilgan va “Gazprom” kompaniyasiga tegishli bo‘lib, 2019-yildan beri uchta texnik nosozliklar haqida xabar berilgan.
Masalan, 2019-yilda samolyotning chap dvigateli reversi ishga tushmagani, 2022-yilda konditsionerlash tizimi ishdan chiqqani, 2023-yilda esa yonilg‘i miqdorining ozligi sababli Yangi Urengoy aeroportiga majburiy qo‘nish amalga oshirgani ma’lum bo‘ldi.
Izoh (0)