Antaliyada tog‘-chang‘i kurortidagi mehmonxonada sodir bo‘lgan yong‘in oqibatida 80 ga yaqin kishi halok bo‘lgandan so‘ng, kamida 50 ta mehmonxona yopildi. Bu haqda NTV kanali xabar berdi.
Tegishli qaror Turkiya Madaniyat va turizm vazirligi Investitsiyalar va tadbirkorlik bosh boshqarmasi tomonidan qabul qilingan. Idora 81 ta provinsiya gubernatorlariga turistik faoliyat sertifikatiga ega bo‘lmagan va ro‘yxatdan o‘tmay faoliyat yuritayotgan mehmonxonalar to‘g‘risida xat yo‘llagan. Vazir o‘rinbosari Nodir Alpaslan imzolagan xatda bunday muassasalarni aniqlash va tegishli choralar ko‘rish so‘ralgan.
Tekshiruvlardan keyin, Antaliyaning Muratpasha rayonidagi 50 ta mehmonxona yopilgan.
Yong‘in 21-yanvar kuni Grand Kartal mehmonxonasining restoran qismida yuz bergan. O‘sha paytda binoda 237 kishi bo‘lgan. Rasmiylar va mutaxassislarning dastlabki baholashiga ko‘ra, mehmonxonada yong‘inga qarshi zaruriy xavfsizlik choralari ko‘rilmagan. Sabah gazetasining xabar berishicha, yong‘in grilni o‘chirmagan xodimlarning xatosi tufayli kelib chiqqan bo‘lishi mumkin.
Favqulodda holatdan so‘ng qo‘zg‘atilgan jinoyat ishi doirasida 15 kishi qamoqqa olingan. Ular orasida mehmonxona egasi Xolit Ergul ham bor. U javobgarlikni xodimlariga yuklagan, ayniqsa, bosh oshpaz, oshxona xodimlari, mehmonxona elektrigi va qo‘riqchilarni ayblagan. Yong‘in sababi hozircha aniqlanmagan, tergov olib borilmoqda, 22-yanvar Turkiyada motam kuni deb e’lon qilingan.
Izoh (0)