Turkiyada korrupsiya ishi bo‘yicha hibsga olingan Istanbul meri Akram Imomo‘g‘li vaqtincha o‘z lavozimidan chetlashtirildi. Bu haqda Halk TV xabar berdi.
Imomo‘g‘li bo‘lajak prezidentlik saylovlarida Rajab Toyyib Erdo‘g‘onning asosiy raqibi bo‘lishi kutilayotgan edi. U 19-mart kuni korrupsiya va terrorchi tashkilotlarni moliyalashtirish aybi bilan qo‘lga olindi. Istanbul universiteti merning diplomini bekor qildi. Imomo‘g‘lining oliy ma’lumoti yo‘qligi prezidentlikka rasman nomzod bo‘lishga imkon bermaydi.
23-mart kuni sud korrupsiyada gumon qilinayotgan Akram Imomo‘g‘lini hibsga olish to‘g‘risida qaror chiqardi. Ikkinchi terrorchilik ishi bo‘yicha tergov doirasida hibsga olish to‘g‘risidagi so‘rov rad etildi. Imomo‘g‘li bilan birga meriyaning bir qator yuqori lavozimli amaldorlari hibsga olingan, jami 90 dan ortiq kishi sud jarayonidan o‘tmoqda.
Halk TV xabariga ko‘ra, Imomo‘g‘li hibsga olish to‘g‘risidagi sud qarori ustidan apellyatsiya berishi mumkin. Istanbul bosh prokuraturasi, o‘z navbatida, Imomo‘g‘lini terrorizm ishi bo‘yicha hibsga olish haqidagi iltimosnomani rad etgan sud qarori ustidan shikoyat qilish niyatida. Rad etib bo‘lmaydigan uzil-kesil qarorni faqat Konstitutsiyaviy sud chiqarishi mumkin.
Turkiya konstitutsiyasining 127-moddasi va 5393-sonli Munitsipalitetlar to‘g‘risidagi qonunning 47-bandiga muvofiq, Imamo‘g‘li vaqtinchalik chora sifatida lavozimidan chetlashtirildi, deydi Ichki ishlar vazirligi.
Vazirlik buni vaqtinchalik chora deb atamoqda. Imomo‘g‘li Marmara qamoqxona majmuasiga olib kelingan.
Dilek Imomo‘g‘li erining qo‘lga olinishini “Turkiyaning bo‘lajak prezidentini yo‘q qilishga qaratilgan maqsadli siyosiy operatsiya” deb atagan. Turkiya adliya vaziri Yilmaz Tunch merni siyosiy ta’qib qilish ayblovlarini rad etgan va Erdo‘g‘onni muxolifatga qarshi repressiyalar va hibsga olishlar bilan bog‘layotganlarni tanqid qilgan. Hukmron Adolat va taraqqiyot partiyasi Erdo‘g‘onga qo‘yilgan ayblovlarni rad etib, Turkiya sud tizimi mustaqilligini e’lon qildi.
Izoh (0)