Xalq deputatlari Toshkent shahar kengashi Veolia Energy Tashkent taklifiga ko‘ra poytaxtda issiq suv va issiqlik ta’minoti xizmatlari tariflari oshirilishini ma’qulladi.
Kengashning 22-avgustdagi qaroriga ko‘ra:
- bazaviy tarif QQSsiz — 711 641 so‘m/Gkal;
- aholi uchun QQSsiz — 139 860 so‘m/Gkal;
- byudjet tashkilotlariga — 952 797 so‘m/Gkal;
- boshqa ulgurji xizmatlar ko‘rsatuvchi tashkilotlarga — QQSsiz 342 296 so‘m/Gkal
miqdorida narxlar (tariflar) qo‘llanilishi ma’qullandi.
Ya’ni issiqlik va issiq suv ta’minoti xizmatlarining yangi chakana tarifi aholi uchun 15 foizga, yuridik shaxslar uchun 40 foizga, byudjet tashkilotlari uchun 18,8 foizga oshirish ko‘zda tutilgan. Endilikda ushbu hujjatni shahar hokimi Shavkat Umurzoqov imzolashi kerak.
Hujjatda yangi tariflarning joriy etilish muddati ko‘rsatilmagan. Veolia Energy Tashkent tariflarni 2025-yil 1-oktyabrdan oshirishni taklif qilgandi.
“Boshqa yo‘limiz yo‘q, uni ko‘tarmasak bo‘lmaydi. Chunki keyingi yillarda qiynalib qolinadi, ya’ni 30 foizdan emas, 40−50 foizdan oshirishga to‘g‘ri kelib qoladi”, degan edi Veolia Energy Tashkent bosh direktori Sevara Pardayeva.
Uning so‘zlariga ko‘ra, poytaxt aholisi bazaviy tarifning atigi 18 foizini to‘laydi, qolgani esa shahar byudjetidan subsidiyalar shaklida qoplanadi. Hukumat 2030-yilgacha issiqlik va issiq suv ta’minoti xizmatlari uchun subsidiyalarni bosqichma-bosqich bekor qilishni rejalashtirmoqda. Veolia Energy Tashkent kelgusi 5 yil ichida tariflarni 100 foiz iste’molchilar to‘lashiga erishishni maqsad qilgan.
Veolia Energy Tashkent matbuot xizmati bergan axborotiga ko‘ra, 2025–2026-yillarda 474,13 kilometr eskirgan uchastkalarni joriy ta’mirlash va almashtirish rejalashtirilgan. Shuningdek, 73,5 kilometr issiqlik tarmoqlarini kapital ta’mirlash, 21,34 kilometr issiqlik izolyatsiyasini tiklash, 23 ta mahalliy qozonxonani va 13 ta nasos stansiyasini modernizatsiya qilish, 669 ta zulfin va 345 ta kompensatorni almashtirish rejalashtirilgan.
Toshkent shahrida issiq suv va issiqlik ta’minoti xizmatlari tariflari 2024-yilda ikki marotaba oshirilgandi. Toshkent viloyatida ham 10-sentyabrdan boshlab issiq suv va isitish xizmatlari narxi oshiriladi.
Izoh (0)