Turkiya prezidenti Rajab Toyyib Erdo‘g‘on Suriyaning hududiy yaxlitligiga rioya etish asosiy shart ekanini ta’kidlab, mamlakatni tashlab ketgan prezident Bashar Asadni tanqid qildi. Bu haqda Anadolu xabar berdi.
Siyosatchi Suriyada yangi voqeliklar yuzaga kelganini aytib, Anqaraning hududiy da’vosi yo‘qligini ta’kidladi.
Suriyada zulmat davri tugab, yorug‘lik boshlandi... Turkiya hech qaysi davlatning hududiga yoki suverenitetiga daxl qilmaydi. Chegaradan tashqari o‘tkazilayotgan amaliyotlarimizning yagona maqsadi vatanimiz va fuqarolarimizni terrorchilik hujumlaridan himoya qilishdan iboratdir. Suriya diniy va konfessional mansubligiga ko‘ra suriyaliklarga tegishli. Suriyaning hududiy yaxlitligi — asosiy shart. Aynan Suriya xalqi qaror qabul qiladi, dedi Erdo‘g‘on.
U suriyaliklar arab, turkman, kurd, sunniy, alaviy yoki nasroniy bo‘lishidan qat’i nazar — tinch-totuv yashaydigan Suriya Turkiyaning eng katta istagi, orzusi va maqsadi ekanini ta’kidladi.
Chegaralar mamlakatlarni jismonan bir-biridan ajratib turishi mumkin, ammo qaysi kuch qalblar o‘rtasidagi chegaralarni ko‘chirishi mumkin? Asrlar davomida yonma-yon yashab kelgan va 910 kilometrlik chegarani baham ko‘rgan qo‘shnilarimizdan yuz o‘girishimizni kim kutishi mumkin?
Agar yuragimizning bir yarmi Antep, Xatay, Shonliurfa bo‘lsa, ikkinchi yarmi Afrin, Halab, Hama, Homs, Damashqdir. Bular tarix va geografiya bizga eslatib turadigan haqiqatlardir. 13 yil oldin qo‘shni mamlakatda yong‘in boshlanganida, birinchi bo‘lib ularga chegaramizni ochdik. 13 yil davomida biz bu odamlarga boshpana berdik. Bugungi kunda ularning soni 2,9 milliongacha kamaydi, dedi u.
Erdo‘g‘onning aytishicha, Suriya mojarosi boshlanganidan buyon Turkiya qo‘shnichilik huquqi va buyuk davlat talablariga qat’iy amal qilib kelmoqda.
Biz tinchlik, ozodlik, muloqot, adolat va Suriyada tezroq tinch yo‘l bilan nizoni hal etish tarafdori edik. Ag‘darilgan rejimning dushmanlik munosabatiga qaramay, har qanday vaziyatda ham Suriya hududiy yaxlitligi va yagona davlat tuzilishini himoya qilib keldik. Hech qachon adolatsizlik, qonunsiz zulm va ta’qiblarga qarshi ovozimizni ko‘tarishdan cho‘chimagandik, dedi u.
Erdo‘g‘on o‘z nutqida Bashar Asadni Suriyani vayronalar ichida tashlab qochganlikda aybladi. U Asad rejimining o‘z xalqiga nisbatan ko‘plab adolatsizlik va vahshiylik holatlariga e’tiborni qaratdi. Jumladan, Suriyada Asaddan so‘ng bir million kishi halok bo‘lgani, 12 million kishi esa ko‘chishga majbur etilganini aytdi.
Izoh (0)