Turkiyada Istanbul shahar hokimi Akram Imomo‘g‘lining qamoqqa olinishi sababli boshlangan norozilik namoyishlarining to‘rt kuni ichida 1,1 mingdan ortiq namoyishchi ushlandi, 123 nafar politsiyachi jarohat oldi. Bu haqda respublika Ichki ishlar vaziri Ali Yerlikaya ma’lum qildi.
“Namoyishlar paytida 123 nafar politsiyachi jarohat oldi. Aksiyalar davomida kislota, toshlar, tayoqlar, pirotexnika vositalari, yonuvchi aralashmali shishalar, boltalar va pichoqlar musodara qilindi. Politsiyaga hujum qilgan, jamoat mulkiga zarar yetkazgan va fuqarolarimiz xavfsizligiga tahdid solganlar ustidan sud jarayonlari davom etmoqda. 2025-yil 19-23-mart kunlari mobaynida noqonuniy xatti-harakatlar sodir etganlikda gumon qilingan 1133 nafar shaxs hibsga olindi. Qo‘lga olinganlar orasida 12 ta turli terrorchilik tashkilotiga aloqador shaxslar borligi aniqlandi”, deb yozgan vazir o‘zining X ijtimoiy tarmog‘idagi sahifasida.
Yerlikaya hibsga olishlar munosabati bilan “so‘nggi kunlarda ayrim guruhlar yig‘ilishlar va namoyishlar o‘tkazish huquqini suiiste’mol qilib, jamoat tartibini buzishga urinayotgani, ko‘cha tadbirlarini qo‘zg‘atib, politsiyaga hujum qilayotganini” ta’kidlagan.
“Hibsga olingan shaxslar ilgari 17 xil jinoyat, jumladan, giyohvand moddalar bilan bog‘liq jinoyatlar, o‘g‘rilik, firibgarlik, jinsiy tajovuz, tan jarohati yetkazish kabi jinoyatlar uchun javobgarlikka tortilgan”, deydi u.
Eslatib o‘tamiz, uchun Istanbul shahri meri, muxolifatdagi Respublika xalq partiyasi vakili Akram Imomo‘g‘li qo‘lga olingani ortidan 19-martdan buyon Turkiya shaharlarida turli namoyishlar o‘tkazilmoqda.
Izoh (0)