Turkiyaning Alanya shahrida qurilayotgan ko‘p qavatli mehmonxona binosida 27-yanvar kuni yong‘in yuz berdi. Bu haqda A Haber xabar berdi.
Dastlab guvohlar yong‘inni o‘chirishga uringan. Ijtimoiy tarmoqlarda tarqalgan videolarda hodisa joyidan ko‘tarilgan qora tutun osmonni qoplab olgani ko‘rinadi. Guvohlar 12 qavatli binoda ishchilar bo‘lganini aytgan. Ishchilar ularni qutqarishlari uchun balkonlarga chiqishgan.
“Men shu yerda yashayman va yong‘in sodir bo‘lgan joyga yaqin joyda turaman. Tutun juda kuchli edi. Yong‘in mehmonxonani ta’mirlash paytida boshlanib ketdi. To‘rt nafar ishchi ichkarida qolib ketdi, lekin ularni qutqarishga muvaffaq bo‘lindi. Men voqea joyiga o‘t o‘chiruvchilardan keyin yetib keldim”, deydi voqea guvohi bo‘lgan Usmon Boysun.
Mehmonxonaga o‘t o‘chirish guruhlari yetib kelgan. Binoning yuqori qavatida qolib ketgan ishchilar qutqarilgan. Ularni evakuatsiya qilish uchun kranlardan foydalanilgan. Aniqlanishicha, yong‘in payvandlash apparatining ishlashi sabab bo‘lgan.
Turkiyada Grand Kartal mehmonxonasidagi yong‘in: 79 kishi halok bo‘ldi
Yong‘in 21-yanvarga o‘tar kechasi Bolu provinsiyasidagi 12 qavatli yog‘och mehmonxonada sodir bo‘ldi. Gubernator Abdulaziz Aydin yong‘in to‘rtinchi qavatdagi restoran zonasida sodir bo‘lgani va butun binoga tarqalganini aytgan. O‘sha paytda mehmonxonada 234 nafar kishi bo‘lgan.
CNN turk nashrining xabar berishicha, favqulodda vaziyat kuni o‘quvchilarning ta’tillari tufayli mehmonxona 80-90 foizga to‘lgan. Yong‘in sababi hozircha aniqlanmagan, tergov olib borilmoqda, 22-yanvar Turkiyada motam kuni deb e’lon qilingan.
Shavkat Mirziyoyev turkiyalik hamkasbi Rajab Toyyib Erdo‘g‘onga tog‘-chang‘i kurortidagi yong‘in oqibatida ko‘plab insonlar qurbon bo‘lgani va jiddiy jarohat olgani munosabati bilan hamdardlik yo‘lladi. Qardosh Turkiya yetakchisi va xalqiga chuqur taʼziya izhor etib, davlat rahbari marhumlarning oila aʼzolari va yaqinlariga sabr-toqat va bardamlik, jabrlanganlar tez fursatda sog‘ayib ketishini tilagan.
Izoh (0)