Turkiyaning Kartalkaya tog‘-chang‘i kurortidagi mehmonxonada 21-yanvar kuni yong‘in sodir bo‘lgandi. Hodisa oqibatida halok bo‘lganlar soni 80 kishiga yetdi. Bu haqda Haberturk xabar berdi.
Turkiya ichki ishlar vaziri Ali Yerlikaya 52 nafar qurbonning shaxsi aniqlanganini ma’lum qildi. 45 nafar halok bo‘lganlarning jasadi oilalarga yetkazilgan. Qolganlari hozircha aniqlanmagan. Yong‘in ishi bo‘yicha to‘qqiz kishi, jumladan, mehmonxona egasi qo‘lga olingan.
Yong‘in 21-yanvarga o‘tar kechasi Bolu provinsiyasidagi 12 qavatli yog‘och mehmonxonada sodir bo‘ldi. Gubernator Abdulaziz Aydin yong‘in to‘rtinchi qavatdagi restoran zonasida sodir bo‘lgani va butun binoga tarqalganini aytgan.
O‘sha paytda mehmonxonada 234 nafar kishi bo‘lgan. CNN Turk nashrining xabar berishicha, favqulodda vaziyat kuni o‘quvchilarning ta’tillari tufayli mehmonxona 80-90 foizga to‘lgan.
“Xotinim kuygan hidni sezdi. Signal ishlamadi. Biz yuqoriga chiqmoqchi bo‘ldik, lekin alanga tufayli chiqa olmadik. Biz pastga tushib, ko‘chaga chiqdik. Yuqori qavatdagi odamlar qichqirardi. Ular derazalardan choyshablarni chiqargandi”, deydi ijarachi Atakan Elkovan.
Yong‘in sababi hozircha aniqlanmagan, tergov olib borilmoqda, 22-yanvar Turkiyada motam kuni deb e’lon qilingan.
Shavkat Mirziyoyev turkiyalik hamkasbi Rajab Toyyib Erdo‘g‘onga tog‘-chang‘i kurortidagi yong‘in oqibatida ko‘plab insonlar qurbon bo‘lgani va jiddiy jarohat olgani munosabati bilan hamdardlik yo‘lladi. Qardosh Turkiya yetakchisi va xalqiga chuqur taʼziya izhor etib, davlat rahbari marhumlarning oila aʼzolari va yaqinlariga sabr-toqat va bardamlik, jabrlanganlar tez fursatda sog‘ayib ketishini tiladi.
Izoh (0)