Mablag‘lar muzlatilgan Rossiya aktivlari tushumlari hisobidan qoplanishi kerak bo‘lgan G7 krediti doirasida taqdim etiladi.
“Bugun Yevropa komissiyasi Ukrainaga alohida makromoliyaviy yordam qarzi doirasida 1 milliard yevro miqdorida qo‘shimcha transh ajratdi. Bu mablag‘ Rossiyaning Yevropa Ittifoqidagi muzlatilgan davlat aktivlaridan tushadigan daromadlar hisobidan qoplanishi kerak. Bu Rossiyaning Ukrainaga qarshi urushi boshlanganidan beri Yevropa ittifoqining eng yirik homiy sifatidagi mavqeyini mustahkamlaydi”, deyiladi xabarda.
Umuman olganda, makromoliyaviy yordam 18,1 milliard yevroni tashkil etadi. Bu Yevropa Ittifoqining “katta yettilik” rahbarligidagi ERA tashabbusiga qo‘shgan hissasi hisoblanadi. Ushbu tashabbus doirasida G7 Ukrainaga taxminan 45 milliard yevro miqdorida moliyaviy yordam ko‘rsatadi. Jumladan, joriy yilda Ukraina ushbu kredit bo‘yicha Yevropa Ittifoqidan jami 4 milliard yevro oldi.
Ukraina Bosh vaziri Denis Shmigal Ukraina Yevropa Ittifoqidan ERA tashabbusi doirasida 1 mlrd yevro olganini tasdiqladi. Uning so‘zlariga ko‘ra, bu muzlatilgan Rossiya aktivlaridan olingan daromadlar bilan ta’minlangan ikkinchi transhdir. Mablag‘lar davlat byudjetining ustuvor xarajatlariga yo‘naltiriladi.
Ta’kidlanishicha, Rossiyaning Ukrainaga qarshi keng ko‘lamli urushi boshlanganidan beri Yevropa ittifoqi umumiy qiymati qariyb 140 milliard yevrolik yordam ko‘rsatdi.
Ma`lumot uchun, Rossiyaning Ukrainadagi maxsus operatsiyasi boshlanganidan so‘ng Yevropa ittifoqi va G7 davlatlari Rossiya valyuta zaxiralarining deyarli yarmini — taxminan 300 milliard yevroni muzlatib qo‘ygan.
Ayni paytda Yevropa ittifoqida 200 milliard yevrodan ortiq mablag‘ mavjud bo‘lib, ularning aksariyati dunyodagi eng yirik hisob-kitob va kliring tizimlaridan biri hisoblangan Belgiyaning Euroclear hisob raqamlarida saqlanmoqda.
Izoh (0)