Ishonish qiyin, ammo ba’zida siyosatchilar ham o‘z ixtiyori bilan iste’foga chiqadi. Yakuniga yetayotgan Merkel davri — fotosuratlarda
Germaniyada 26-sentabr kuni parlament saylovlari bo‘lib o‘tdi, uning yakunlariga ko‘ra, Angela Merkel kansler lavozimini tark etadi. U mag‘lubiyatsiz ketmoqda: u hukumat rahbarligini o‘z ixtiyori bilan topshirishga qaror qildi, ushbu lavozimda 16 yil ishlab, bu borada ustozi Gelmut Kolning rekordini yangiladi. Jahon siyosatidagi eng katta ta’sirga ega ayol bilan xayrlashish bir necha oy davom etishi mumkin, chunki yangi hukmron koalitsiyani tuzish bo‘yicha muzokaralar cho‘zilishi kutilmoqda. Shunga qaramay, Merkel davri nihoyalab bormoqda. Meduza uning faoliyatidagi muhim bosqichlar aks etgan fotosuratlarni jamladi.
Angela Kasner (turmushga chiqqach Merkel familiyasini olgan) Himmelpfortdagi lagerda ovqat pishirmoqda. Leypsig universitetida fizika yo‘nalishi bo‘yicha tahsil olgan Merkel 1973-yilning iyulida oliygohni tugatgandan so‘ng do‘stlari bilan shu lagerga kelgan. Merkel mamlakat g‘arbidagi Gamburgda tug‘ilgan bo‘lsa-da, Sharqiy Germaniyada o‘sgan.Foto: AFP
Merkel qizg‘in siyosiy faoliyatini Germaniya Demokratik Respublikasining so‘nggi yillarida boshlagan va “Demokratik yutuqlar” guruhiga qo‘shilgan. Germaniya birlashgandan ko‘p o‘tmay, Merkel Ayollar va yoshlar ishlari bo‘yicha federal vaziri etib tayinlandi. Shu tariqa u Sharqiy Germaniyaning umumgerman tuzilmasidagi ilk vakillardan biriga aylandi. Merkel 1991-yil 18-yanvarda Bundestagda qasamyod qildi. O‘sha paytda parlament majlislari hali G‘arbiy Germaniya poytaxti Bonnda o‘tkazilardi.Foto: AFP
Merkelning siyosiy karyerasi tez rivojlandi: 1991-yil dekabrda u Xristian demokratik ittifoqida kansler Gelmut Kolning o‘rinbosariga aylandi. Uni istehzo bilan — “Kolyaning qizi” deb atashardi.Foto: LETA
Vaqt o‘tishi bilan Merkelning mehnatsevarligi tillarga tushdi. 1992-yil 3-fevralda u uch hafta oldin oyog‘ini sindirib olganiga qaramay, Xristian demokratik ittifoqi prezidiumining yig‘ilishida qatnashdi.Foto: AP Photo
Ayollar va yoshlar ishlari vazirligi kichik muassasa edi, 1994-yilda Merkel kattaroq vazirlikni o‘z qo‘liga oldi — u atrof-muhitni muhofaza qilish vaziri etib tayinlandi. Yangi yil arafasida vazirlik uning ishtirokida reklama e’lon qildi: Merkel sovg‘a o‘raydigan qog‘ozni qayta ishlatish uchun qanday tayyorlash mumkinligini ko‘rsatgan. Bundan maqsad yog‘ochni tejash va o‘rmonlarning kesilishini kamaytirish edi.Foto: ullstein bild
1996-yil fevral oyida Merkel Chernobil AESga tashrif buyurdi. Zavoddagi falokat nemis jamiyatida katta taassurot qoldirgan, bu hodisa “Yashillar” harakatining xalq orasida mashhur bo‘lishi, shuningdek, atom energiyasidan voz kechish haqida jiddiy munozaralarning boshlanishiga yordam berdi. Merkel kansler bo‘lgach, Fukusima avariyasidan keyin, bu jarayonni kuchaytirib kelmoqda.Foto: Getty Images
1998-yilgi saylovlarda xristian -demokratlar mag‘lubiyatga uchraganidan so‘ng, Merkel Germaniya hukumatini tark etdi, lekin Bundestag a’zosi bo‘lib qoldi va Xristian-demokratlar ittifoqining bosh kotibiga (aslida partiya ishining rahbari) aylandi. Ushbu fotosurat 2000-yil mart oyida Boltiqbo‘yida olingan.Foto: ullstein bild
Xristian-demokratlar ittifoqining to‘laqonli yetakchisi Angela Merkel 2005-yil 18-sentabrda bo‘lib o‘tgan saylovlarda ovoz bermoqda. Ushbu saylovdagi g‘alaba natijasida u mamlakat hukumatini boshqardi va keyingi 16 yil davomida kansler bo‘lib qoldi.Foto: EPA
Germaniya Federativ Respublikasining birinchi ayol kansleriga aylangan Angela Merkelning portreti Berlindagi KanzlerEck (“Kansler burchagi”) mehmonxonasida avvalgi hukumat rahbarlarining portretlari yoniga ilinmoqda. 2005-yil 23-noyabr.Foto: EPA
Angela Merkel, Vladimir Putin va labrador Konni “Bocharov Ruchey” qarorgohida, 2007-yil 21- yanvar. Kansler itlarni yoqtirmaydi. Ikki rahbar o‘rtasidagi shaxsiy munosabatlar hech qachon iliqlashmagan: Qrim Rossiyaga qo‘shib olingandan so‘ng, Amerika matbuoti xabarida yozilishicha, Merkel Obamaga Rossiya prezidenti “butunlay boshqa dunyoda yashayotganini” aytgan.Foto: “TASS”
Merkel siyosatining asosiy yo‘nalishlaridan biri mamlakatni xavfli va qayta tiklanmaydigan energiya manbalaridan bosqichma-bosqich voz kechishiga qaratilgan energetik burilish (Energiewende) edi. 2010-yil 18-avgustda u Krempindagi shamol elektrostansiyasiga tashrif buyurdi. “Yashil energiya”ga yirik hajmdagi sarmoyalar kiritilganiga qaramay, Germaniya hukumati o‘z oldiga qo‘ygan maqsadlarning hammasiga erisha olmadi. Shu sababli Merkel hukumati uchun “Shimoliy oqim 2” quvurini qurib bitkazish muhim ahamiyatga ega bo‘ldi. Loyiha atom energiyasidan voz kechish va ko‘mir qazib olish oqibatida ko‘rilgan zararni qoplashi kerak edi.Foto: Getty Images
Yillar davomida Merkel Germaniyaning eng sevimli siyosatchisiga aylandi. Uning o‘z farzandlari yo‘q, lekin nemis gazetalarida uni “onajon” (Mutti) deb atashadi. Suratda u Germaniya shimolidagi o‘zini saylagan Marlou okrugidagi bog‘da to‘tiqushlarni ovqatlantirmoqda. 2012-yil 17-aprelFoto: DPA
Chapdan o‘ngga: Buyuk Britaniya bosh vaziri Devid Kameron, AQSh prezidenti Barak Obama, Angela Merkel va Yevrokomissiya raisi Xose Manuel Barrosa 2012-yil 19-maydagi “Chelsi” — “Bavariya” Chempionlar ligasi finalini tomosha qilmoqda. Unda Angliya penaltilar seriyasida g‘alaba qozongandi.Foto: Reuters
Aytishlaricha, Angela Merkel va Barak Obama o‘rtasida alohida hamfikrlik bor edi. Surat 2015-yil iyun oyida Bavariya Alplarida bo‘lib o‘tgan G7 sammiti doirasida ikki siyosatchining uchrashuvidan olingan.Foto: AP Photo
2015-yildagi migratsion inqiroz Angela Merkel uchun eng og‘ir sinovlardan biri bo‘ldi. 25-avgustda Merkel hukumati Germaniyadan boshpana olish qoidalarining yengillashtirilishini e’lon qildi, ertasi kuni esa kansler mamlakat sharqidagi Xaydenau lageriga tashrif buyurdi. Keyingi oylarda mamlakatga Yaqin Sharqdan bir necha million qochqin keldi. Merkelning siyosatini o‘nglar ham, so‘llar ham tanqid qildi, natijada “Germaniya uchun muqobil” o‘nglar populistining mashhurligi oshdi.Foto: AFP
Maxsus ko‘zoynak taqqan Angela Merkel astronavtlarni tayyorlash bo‘yicha Yevropa markaziga tashrifi chog‘ida. Keln, 2016 yil 18 –mayFoto: Getty Images
Agar Merkel Barak Obama bilan juda iliq munosabatda bo‘lgan bo‘lsa, Donald Tramp kanslerning asosiy raqiblaridan biriga aylandi. Tramp uni bir tarafdan Rossiyaga qarshi sanksiyalar joriy etib, boshqa tarafdan “Shimoliy oqim 2” quvurini qurayotgani va NATO oldidagi moliyaviy majburiyatlarini bajarmayotgani uchun tanqid qildi. 2018-yilda Kvebekdagi G7 sammitidan oldin, Tramp Qrimni Rossiya hududi deb bilishi haqida bir nechta shov-shuvli bayonotlar berdi, uchrashuvni esa qo‘shma bayonotga imzo chekmasdan tark etdi.Foto: Reuters
Qo‘llarni shu tarzda qovushtirish “Merkel jesti” deb atala boshladi.Foto: photothek.net
Kanslerning bir rangda kostyum kiyishi ham o‘zgarmas qoidaga aylangandiFoto: EPA
Ukraina Prezidenti Vladimir Zelenskiy ilk xorijiy tashrifini 2019-yil 18-iyun kuni Berlinga uyushtirdi. Zelenskiyning maqsadlaridan biri Germaniyaning “Shimoliy oqim 2”dan voz kechishiga erishish edi — bu quvur orqali Ukraina Rossiya gazining tranzitidan oladigan daromadidan mahrum bo‘lardi. Lekin Zelenskiy o‘shanda ham, undan keyin ham maqsadiga erisha olmadi. Kansler lavozimidagi so‘nggi yillarda Merkel Ukraina sharqidagi nizoni hal qilishda u qadar faollik ko‘rsatmagan, lekin aynan uning diplomatik sa’y-harakatlari tufayli 2015-yil boshida Minsk kelishuvlari imzolandi, shundan so‘ng mintaqada faol harbiy harakatlar to‘xtatilgan.Foto: AFP
Pandemiya Merkel uchun ham siyosiy g‘alaba, ham sinov bo‘ldi. Dastlabki oylarda nemislar iqtisodiyotga yordam sifatida ko‘rilgan choralari bilan bir qatorda hukumat tomonidan qo‘yilgan qattiq cheklovlarni qo‘llab-quvvatladi, bu davrda ko‘plab siyosatchilar hatto Merkel o‘z lavozimini tark etmasdan beshinchi muddatga kanslerlikni davom ettirishi kerakligi haqida gapira boshlashdi. Ammo emlash kampaniyasi boshlanishi va cheklovlarning bosqichma-bosqich olib tashlanishi bilan tanqidlar sezilarli darajada oshdi. Merkelning o‘zi ushbu suratdagi kabi haligacha har qanday yopiq binoda niqobda yuradi. Surat 2021-yil 13-yanvarda Bundestag yig‘ilishi paytida olingan.Foto: Bildgehege
Izoh (0)