Nyu Yorkda bo‘lib o‘tgan “G7+Ukraina” yig‘ilishida Yevropa ittifoqi va 30 dan ortiq davlat Rossiya hujumidan jabr ko‘rgan Ukraina hududlarini qayta tiklash bo‘yicha qo‘shma deklaratsiya qabul qildi.
Ukraina prezidenti ofisining rasmiy saytida e’lon qilingan uchrashuv yakunlari bo‘yicha press-relizda qayd etilishicha, hujjatda G‘arbda muzlatib qo‘yilgan Rossiya aktivlaridan tushgan daromadlardan foydalanish masalasi ko‘rib chiqiladi.
Deklaratsiya bandlari orasida “Ukrainaning YIga a’zo bo‘lish yo‘lida tiklanishiga to‘liq yordam”, 2023-yilda ishga tushirilgan Ukraina donor platformasini qo‘llab-quvvatlash, shuningdek, Kiyevga taxminan 50 mlrd dollar miqdorida qo‘shimcha moliyaviy yordam ko‘rsatish o‘rin olgan.
“Buning uchun G‘arb mamlakatlarida muzlatilgan Rossiya aktivlaridan tushadigan daromad ishlatiladi va pulning bir qismi Ukrainaning mudofaa ehtiyojlariga yo‘naltiriladi”, deyiladi hisobotda.
Mazkur deklaratsiyani imzolashda Ukraina prezidenti Vladimir Zelenskiy, Yevrokomissiya raisi Ursula fon der Lyayen, Britaniya bosh vaziri Key Starmer, Italiya va Kanada prezidentlari Jorj Meloni hamda Jastin Tryudo, shuningdek, AQSH prezidenti Jo Bayden va 20 dan ortiq boshqa mamlakat vakillari ishtirok etdi.
Izoh (0)