Yevropa ittifoqi Xitoy kompaniyalariga Rossiya korxonalari bilan hamkorlik qilgani uchun sanksiyalar joriy etib, ikki xil standartlarga qo‘l urmoqda, dedi Xitoy Tashqi ishlar vazirligi matbuot kotibi Mao Ning.
Uning so‘zlariga ko‘ra, Pekin hech qachon Rossiya-Ukraina mojarosida qatnashayotgan tomonlardan biriga qurol yetkazib bermagan.
25-noyabr kuni Bloomberg agentligi “Yettilik guruhi” va Yevropa ittifoqining Xitoyga qarshi cheklovchi choralar, jumladan, “Rossiyaga harbiy yordam ko‘rsatgani uchun” sanksiya qo‘llashi haqida xabar bergan edi.
“Aksariyat davlatlar, jumladan, Yevropa va AQSH hozirda Rossiya bilan savdo qilmoqda. Biz Yevropa tomonini ikki xil standartlarni qo‘llamaslikka chaqiramiz. Xitoy va Rossiya kompaniyalari o'rtasidagi muntazam almashinuv va hamkorlik hech kimga qarshi emas. Bu munosabatlar uchinchi tomonning aralashuvi yoki ta'siriga duchor bo'lmasligi kerak”, dedi Mao Ning.
Uning qo‘shimcha qilishicha, Xitoy har doim ikki maqsadli mahsulotlar, shu jumladan, fuqarolik dronlari eksportini nazorat qiladi. “Ukraina masalasida Xitoy doimo tinchlik va muzokaralar uchun harakat qilgan”, deya ta'kidladi Xitoy TIV vakili. Uning qo‘shimcha qilishicha, Xitoy hali ham bir tomonlama sanksiyalarga qarshi.
Bloomberg manbalarga tayanib yozishicha, Yevrokomissiya rossiyalik firmalarga elektron komponentlar yetkazib berish orqali dronlarni yaratishda yordam bergani aytilayotgan Xitoy kompaniyalariga qarshi sanksiyalar qo‘llash imkoniyatini ko‘rib chiqmoqda.
Ayni paytda, 25-26-noyabr kunlari Italiyada bo‘lib o‘tadigan “Yettilik guruhi” mamlakatlari tashqi ishlar vazirlari “Rossiyaning harbiy harakatlarini qo‘llab-quvvatlaganliklari uchun” Xitoy va boshqa davlatlarga nisbatan sanksiyalarni joriy etishga tayyorlamoqda, deb xabar berdi Bloomberg.
Avvalroq AQSHning saylangan prezidenti Donald Tramp uchta davlat — Meksika, Kanada va Xitoy tovarlariga bojlar joriy etmoqchi ekani xabar qilingandi.
Tramp Meksika va Kanada tovarlariga 25 foizlik, Xitoynikiga esa 10 foizlik boj joriy etishini rejalashtirgan.
Izoh (0)