Yevropa ittifoqi diplomatiyasi rahbari Josep Borrel Donald Trampni saylovdagi g‘alabasi bilan tabriklar ekan, AQSH bilan hamkorlikni davom ettirishga umid bildirdi.
U, shuningdek, kuchli va suveren Yevropa qurish rejalarini e’lon qildi.
“Yagona tashqi ishlar va xavfsizlik siyosatining bir qismi sifatida Yevropa ittifoqi Qo‘shma Shtatlar bilan faol munosabatlarni saqlab qolish uchun bor kuchini ayamaydi”, deb yozdi Borrel X’dagi sahifasida.
Uning qayd etishicha, ayni paytda YI kuchli va suveren Yevropani barpo etish uchun turli sohalarda – mudofaa va xavfsizlikdan tortib iqlimgacha bo‘lgan majburiyatlarni bajarishda davom etmoqda. Borrelga ko‘ra, Trampning saylanishi global xavfsizlik bilan bog‘liq barcha mintaqalar, jumladan, Yaqin Sharq va Ukraina uchun ham ta’sir ko‘rsatadi.
O‘z navbatida, Fransiya prezidenti Emmanuel Makron Trampning saylovlarda g‘alaba qozonganini eʼlon qilishi fonida Yevropa yetakchilari kuchli va mustaqil Yevropani yaratishga eʼtibor qaratishlari kerakligini taʼkidlagandi. U Germaniya kansleri Olaf Shols bilan vaziyatni muhokama qilganiga aniqlik kiritib, yangi sharoitda YI yanada birlashishi va kuchliroq bo‘lishi kerakligini qo‘shimcha qilgan. Shu bilan birga, siyosatchi Yevropa manfaatlari va qadriyatlarini himoya qilish uchun AQSH bilan hamkorlik qilish muhimligini qayd etgan.
Yevrokomissiya rahbari Ursula fon der Lyayen Donald Trampni g‘alabasi bilan tabriklagan va kuchli transatlantik kun tartibida hamkorlik qilishni taklif qilgan.
Izoh (0)