“Yevropa ittifoqi mamlakatlari rasmiylari Ukrainaga AQSH ko‘magisiz yordam ajratish mexanizmini muhokama qilmoqda”, deb yozadi The Wall Street Journal manbalarga tayanib.
Nashrning qayd etishicha, joriy yil 7-noyabr kuni Yevropa siyosiy hamjamiyatining sammiti bo‘lib o‘tgan Vengriya parlamentida tashkil etilgan kechki ovqatda Yevropa davlatlari vakillari ushbu tashabbusni muhokama qilgan.
WSJ maqolasida qayd etilishicha, Yevropa ittifoqi yetakchilari birinchi marta AQSHning saylangan prezidenti Donald Tramp Ukrainaga yordamni to‘xtatsa, “bo‘shliqni qanday to‘ldirish”ni muhokama qilgan. Siyosatchilar agar Amerikaning yangi prezidenti shunday qaror qabul qilsa, Ukrainani qo‘llab-quvvatlashni kuchaytirish zarur degan umumiy fikrga kelgan.
“Fransiya prezidenti Emmanuel Makron va Italiya bosh vaziri Jorjiya Meloni bunday tashabbusga ehtiyotkorlik bilan yondashadi”, deb yozadi WSJ. Vengriya va Slovakiya vakillari Ukrainani moliyalashtirish va qurol-yaroq yetkazib berishga qarshi chiqdi.
Nashrning Yevropa ittifoqidagi manbasiga ko‘ra, Yevrokomissiya ijroiya organi kelasi oy Bryusselda yig‘ilganda AQSH ishtirokisiz moliyalashtirish variantlarini taqdim etishi kerak bo‘ladi.
AQSH Ukrainaga eng yirik moliyaviy yordam yetkazib beruvchi hisoblanadi. Yevropa ittifoqining tashqi aloqalar bo‘yicha kengashi maʼlumotlariga ko‘ra, AQSH hukumati 2022-yil fevralidan boshlab Ukrainaga 106 milliard dollar ajratgan. Buning 70 milliard dollari faqat harbiy yordamdan iborat.
27 davlatdan iborat Yevropa ittifoqi Ukraina hukumatiga moliyaviy, gumanitar va harbiy yordam sifatida 133 milliard dollar ajratdi.
Joriy yil 7-noyabr kuni Budapeshtda Yevropa siyosiy hamjamiyatining yig‘ilishi bo‘lib o‘tdi. Uchrashuvda Yevropa ittifoqi yetakchilari Amerikadagi prezidentlik saylovlari natijalari va saylangan prezident Donald Tramp bilan o‘zaro hamkorlik strategiyasini muhokama qilgan.
Izoh (0)