Yevrokomissiya raisi Ursula fon der Lyayen Polsha raisligining inauguratsiyasi munosabati bilan Gdanskda bo‘lib o‘tadigan YIning sayyor yig‘ilishiga kela olmaydi. Bu haqda Yevrokomissiya matbuot kotibi Stefan de Keyersmaker xabar berdi.
Uning aniqlik kiritishicha, fon der Lyayenga og‘ir pnevmoniya tashxisi qo‘yilgan.
Yevrokomissiya matbuot kotibining so‘zlariga ko‘ra, Polsha raisligining inauguratsiyasi munosabati bilan uchrashuv boshqa kuni bo‘lib o‘tadi. Ursula fon der Lyayen 9 va 10-yanvar kunlari Polshada bo‘lib o‘tadigan Yevropa ittifoqining sayyor yig‘ilishida raislik qilishi kerak edi.
De Keyersmakerning aniqlik kiritishicha, fon der Lyayen kasallik tufayli 2025-yilning dastlabki ikki haftasida o‘z vazifalarini bajarmaydi. Matbuot kotibi Yevrokomissiya raisining sog‘lig‘i yoki qayta belgilangan uchrashuvlar sanasi haqida batafsil ma’lumot bermagan.
Noyabr oyi oxirida Yevroparlament fon der Lyayen boshchiligidagi Yevropa komissiyasining yangi tarkibini tasdiqlagan edi.
Strasburgda bo‘lib o‘tgan yalpi majlisda Yevroparlament aʼzolari ushbu lavozimga qayta saylangan Ursula fon der Lyayen boshchiligidagi Yevropa komissiyasining yangi tarkibini, shuningdek, Yevropa ittifoqining Oliy vakili etib estoniyalik Kaya Kallasni ko‘pchilik ovoz bilan qo‘llab-quvvatlagan.
Ovoz bergan 688 deputatdan 370 nafari yangi komissiyani qo‘llab-quvvatlagan, 282 nafari qarshi, 36 nafari betaraf qolgan.
Izoh (0)