Маблағлар музлатилган Россия активлари тушумлари ҳисобидан қопланиши керак бўлган G7 кредити доирасида тақдим этилади.
“Бугун Европа комиссияси Украинага алоҳида макромолиявий ёрдам қарзи доирасида 1 миллиард евро миқдорида қўшимча транш ажратди. Бу маблағ Россиянинг Европа Иттифоқидаги музлатилган давлат активларидан тушадиган даромадлар ҳисобидан қопланиши керак. Бу Россиянинг Украинага қарши уруши бошланганидан бери Европа иттифоқининг энг йирик ҳомий сифатидаги мавқейини мустаҳкамлайди”, дейилади хабарда.
Умуман олганда, макромолиявий ёрдам 18,1 миллиард еврони ташкил этади. Бу Европа Иттифоқининг “катта еттилик” раҳбарлигидаги ERА ташаббусига қўшган ҳиссаси ҳисобланади. Ушбу ташаббус доирасида G7 Украинага тахминан 45 миллиард евро миқдорида молиявий ёрдам кўрсатади. Жумладан, жорий йилда Украина ушбу кредит бўйича Европа Иттифоқидан жами 4 миллиард евро олди.
Украина Бош вазири Денис Шмигал Украина Европа Иттифоқидан ERА ташаббуси доирасида 1 млрд евро олганини тасдиқлади. Унинг сўзларига кўра, бу музлатилган Россия активларидан олинган даромадлар билан таъминланган иккинчи траншдир. Маблағлар давлат бюджетининг устувор харажатларига йўналтирилади.
Таъкидланишича, Россиянинг Украинага қарши кенг кўламли уруши бошланганидан бери Европа иттифоқи умумий қиймати қарийб 140 миллиард евролик ёрдам кўрсатди.
Ма`лумот учун, Россиянинг Украинадаги махсус операцияси бошланганидан сўнг Европа иттифоқи ва G7 давлатлари Россия валюта захираларининг деярли ярмини — тахминан 300 миллиард еврони музлатиб қўйган.
Айни пайтда Европа иттифоқида 200 миллиард евродан ортиқ маблағ мавжуд бўлиб, уларнинг аксарияти дунёдаги энг йирик ҳисоб-китоб ва клиринг тизимларидан бири ҳисобланган Бельгиянинг Euroclear ҳисоб рақамларида сақланмоқда.
Изоҳ (0)