“Daryo” nashri 16-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Polshaga raketalar kelib tushgani munosabati bilan Bayden G7 yetakchilarining favqulodda majlisini o‘tkazdi
Polshaga raketa kelib tushgani sababli AQSH prezidenti Jo Bayden G7 yetakchilarining shoshilinch yig‘ilishini o‘tkazdi, translyatsiya Oq uy tomonidan olib borildi. “Katta yettilik”ka Yaponiyadan tashqari Britaniya, Germaniya, Italiya, Kanada, AQSH va Fransiya kiradi. Shuningdek, sammitlarda Yevroittifoq vakillari ham qatnashadi.
Oq uy saytida AQSH prezidenti Jo Baydenning “jahon yetakchilari” bilan favqulodda yig‘ilishi translyatsiyasi haqida e’lon paydo bo‘ldi. Videoda uchrashuv boshlangani ko‘rsatilgan, unda Amerika prezidentidan tashqari, “katta yettilik” mamlakatlari yetakchilari, Yevrokomissiya rahbari Ursula fon der Lyayyen va Yevrokengash rahbari Sharl Mishel qatnashgan.
15-noyabr kuni Ukraina hududi yoppasiga hujumga uchradi, energetika infratuzilmasi obyektlari uning nishoniga aylandi. Hukumat portlashlar va elektr energiyasidagi uzilishlar haqida ma’lum qildi. Shundan keyin Polshaning Zet radiosi Ukraina bilan chegaradan 8 km uzoqlikda, Lyublinsk viloyatidagi Pshevodov qishlog‘ida joylashgan don quritish inshootida portlash yuz berib, oqibatda ikki kishi halok bo‘lganini ma’lum qildi.
Polshada milliy xavfsizlik qo‘mitasi favqulodda yig‘ilish o‘tkazdi, shundan keyin Varshava ba’zi harbiy qismlarda jangovar shaylikni oshirdi. Bir qator mamlakatlar hodisada Rossiyani aybladi. Rossiya Mudofaa vazirligi portlashga aloqadorligini rad etdi va Polsha-Ukraina chegarasiga yaqin obyektlarga zarbalar berilmaganini ma’lum qildi. Mudofaa idorasi bunday xabarlarni “keskinlikni kuchaytirishga qaratilgan provokatsiya” deb atagan.
Pentagon Polshaga kelib tushgan raketalar Rossiyaniki bo‘lganini hozircha tasdiqlay olmasligini bildirdi. OAVlarga ko‘ra, voqea joyidan topilgan raketa bo‘laklarida yozuvlar yo‘q. Keyinroq Associated Press tomonidan Polshaga tushgan raketalar Ukraina armiyasining Rossiya hujumlarini qaytarish uchun otgan raketalari bo‘lishi mumkinligi ma'lum qilindi.
Ukraina keng ko'lamda raketa hujumlariga uchragan payti AQSH Markaziy razvedka boshqarmasi direktori Kiyevda bo'lgan
AQSH Markaziy razvedka boshqarmasi (MRB) direktori Uilyam Berns Kiyevga tashrif buyurdi va Ukraina prezidenti Vladimir Zelenskiy bilan uchrashdi, deb yozmoqda Washington Post.
Uchrashuvda Berns “AQSHning Rossiya agressiyasiga qarshi kurashda Ukrainaga yordam berish majburiyatini tasdiqlagan”. AQSH MRB rahbari tashrif buyurgan kuni butun Ukraina bo‘ylab havo trevogasi yangradi, havo hujumidan mudofaa tizimlari ishga tushdi — Zelenskiy Kiyev va Ukraina viloyatlariga o‘nlab raketa uchib kelgani haqida xabar berdi, ularning aksariyati energetika infratuzilmasiga qaratilgan.
Washington Post gazetasiga ko‘ra, raketa hujumlari paytida Berns AQSH elchixonasida bo‘lgan. Nashr ma’lumotlariga ko‘ra, Rossiya Ukraina hududiga ataydan MRB direktorining tashrifi vaqtida zarba bergani haqida ma’lumot yo‘q.
14-noyabr, dushanba kuni Berns Anqarada Rossiya Tashqi razvedka xizmati rahbari Sergey Narishkin bilan uchrashgan edi. Uchrashuvda “Rossiya tomonidan yadro quroli qo‘llanilishi oqibatlari” muhokama qilingan.
AQSH Shahed dronlarini ishlab chiqaruvchi Eron kompaniyasiga qarshi sanksiyalar kiritdi. Rossiya bu qurollardan Ukraina bilan urushda foydalanmoqdami?
AQSH Moliya vazirligi Rossiya Ukrainaga qarshi urushda foydalanayotgan dronlarni ishlab chiqarish va tashish uchun mas’ul Eron kompaniyalariga nisbatan sanksiyalar joriy qildi. Bu haqda AQSH moliya vazirligi matbuot xizmati xabar berdi.
Vazirlik ma’lumotlariga ko‘ra, dronlarni ishlab chiqarish bilan shug‘ullanuvchi Shahed Aviation Industries, shuningdek, ularni Rossiyaga yetkazib berishga aloqador Success Aviation Services FZC va Jet Global DMCC kompaniyalari AQSH sanksiyalari ostiga tushgan.
Bundan tashqari, 2 nafar jismoniy shaxsga nisbatan ham sanksiyalar joriy etilgan. Amerika ma’lumotlariga ko‘ra, ular “Vagner” xususiy harbiy kompaniyasini Eron dronlari bilan ta’minlagan. Rossiya Ukrainadagi urushda Eronda ishlab chiqarilgan Shahed-131 va Shahed-136 dronlaridan foydalanmoqda, Rossiya Qurolli kuchlari ularning nomini “Geran-1” va “Geran-2” deb o‘zgartirib olgan. Rossiya rasmiylari dronlarning Erondan olib kelinishini tan olmayapti.Noyabr oyi boshida Eron tashqi ishlar vaziri Husayn Abdullohian Rossiyaga bir qancha dronlar yuborilganini tasdiqlab, bu urush boshlanishidan bir necha oy oldin sodir bo‘lganini aytdi.
O‘zbekistonda elektr ta’minotidagi uzilishlar va aholiga tabiiy gaz yetkazib berish masalalari ko‘rilmoqda
Energetika vaziri o‘rinbosari Sherzod Xo‘jayev elektr ta’minotida bir soatdan ortiq cheklov kiritgan hududdagi mas’ullarga chora ko‘rilishini ma’lum qildi. Bu haqda u ayni paytda AOKAda bo‘lib o‘tayotgan matbuot anjumanida aytdi, deya xabar berdi “Daryo” muxbiri. Vazir o‘rinbosari bugun OAV vakillariga yuzma-yuz kelib, ularni va jamoatchilikni qiziqtirgan savollarga javob bermoqda.
Xatolarimiz bor, biz buni tan olamiz. Ishlab chiqarish sohalarida yo‘l qo‘ygan kamchiliklarimiz ham bor. Shu bois biz aholidan tejamkor bo‘lishini so‘raymiz, o‘zimizni oqlamoqchi ham emasmiz.
Qaysi hududlarda elektr energiyasidagi uzilishlar yarim yoki bir soatdan oshib ketayotgan bo‘lsa, buning sabablarini o‘rganamiz. Kerak bo‘lsa, kamchiliklarga yo‘l qo‘ygan mas’ullarga chora ko‘ramiz”, — deydi Energetika vazirligi o‘rinbosari Sherzod Xo'jayev.
Mazkur tadbirda shuningdek, “O‘zbekneftgaz” boshqaruv raisi Mehriddin Abdullayev ham so‘z olib, GTL kompaniyasidagi ishlab chiqarish 50 foizga kamaytirilib, qolgan gaz aholiga berilishi rejalashtirilayotganini ma’lum qildi.
Vaziri o‘rinbosari Sherzod Xo‘jayevning qo‘shimcha qilishicha, tez kunda cheklovlar masalasi 80 foizga hal etiladi. “Buning uchun tabiiy gaz va elektr energiyasi eksporti to‘xtatildi. Tashqi import 20 foizga oshirildi. Bugungi kundagi uzilishlar 8-10 soatlab tokni o‘chirishga sabab bo‘lolmaydi”, — deydi u.
Izoh (0)