Yevrokomissiya Google qidiruv tizimini o‘z ichiga olgan Alphabet kompaniyasiga Yevropa ittifoqining raqamli bozorida raqobat qoidalarini muntazam ravishda buzayotgani to‘g‘risida ogohlantirish yubordi. Bu haqda Komissiya matbuot xizmatining xabarida aytilgan.
Yevrokomissiyaning dastlabki xulosasiga ko‘ra, Google qidiruv tizimi raqobatchilar oldidagi ustunligidan foydalanib, Alphabet kompaniyasining o‘z xizmatlarini ilgari surmoqda. “Bu Yevropa ittifoqining Raqamli bozorlar to‘g‘risidagi qonuni talab qilganidek, uchinchi tomon xizmatlariga shaffof, adolatli va kamsitishsiz munosabatni ta’minlamaydi”, deyiladi hujjatda.
Bundan tashqari, Yevrokomissiya fikriga ko‘ra, Google Play internet-do‘koni ham Yevropa qoidalarini buzib, uchinchi tomon ilovalarini ishlab chiquvchilarning foydalanuvchilarni yanada foydali takliflar bilan muqobil havolaga yo‘naltirish imkoniyatlarini cheklaydi. Shuningdek, YK Google’ni mijozlarni topishda yordam bergani uchun ishlab chiquvchilardan haddan tashqari yuqori haq olishda ayblamoqda.
Alphabet kompaniyasiga Yevrokomissiya da’volari bilan tanishish va tegishli izohlar berish imkoniyati berildi. Agar bu izohlar YKni qanoatlantirmasa, u holda Yevropa qoidalarini buzganligi uchun kompaniyaga qarshi choralar ko‘rilishi mumkin.
Raqamli bozorlar to‘g‘risidagi qonun (Digital Markets Act, DMA) 2022-yil 1-noyabrda kuchga kirgan va Yevropa ittifoqida 2023-yil mayidan boshlab qo‘llanila boshlangan. Ushbu qonun “raqamli sektor bozorlarini yanada adolatli va raqobatbardosh qilish”ga, so‘nggi foydalanuvchilarga ko‘proq tanlov va erkinlik berishga qaratilgan. Keyinchalik Yevrokomissiya Alphabet, Amazon, Apple, ByteDance, Meta, Microsoft, X tarmog‘i kabi bir qator kompaniyalarni eng yirik onlayn platformalar sifatida belgilagan. Bu kompaniyalar Yevrokomissiyaning to‘g‘ridan-to‘g‘ri nazorati ostiga olingan.
Komissiya ushbu kompaniyalarning DMA doirasidagi majburiyatlarini samarali bajarishini kuzatib borishi haqida ogohlantirdi. Kompaniya majburiyatlarga rioya qilmagan taqdirda YK unga o‘tgan moliyaviy yildagi umumiy jahon aylanmasining 10 foizigacha, takroran buzilgan taqdirda esa 20 foizigacha miqdorda jarima solishi mumkin. Muntazam qoidabuzarliklar sodir etilgan taqdirda esa, Yevrokomissiya qo‘shimcha huquqiy choralar ko‘radi, hatto qoidabuzar kompaniyani Yevropa ittifoqidagi biznesini sotishga majbur qiluvchi qaror qabul qilishgacha borib yetishi mumkin.
Izoh (0)