Germaniya hukumati kelayotgan qish faslida Ukrainani energiya bilan ta’minlash uchun qo‘shimcha 70 million yevrodan ortiq mablag‘ ajratadi. Bu haqda Germaniya Iqtisodiy hamkorlik va rivojlanish vazirligi xabarida aytilgan.
“Qo‘shimcha mablag‘lar hisobiga Germaniya blokli issiqlik elektr stansiyalari, qozonxonalar, generatorlar va quyosh elektr stansiyalarini Ukraina shaharlari va shahar hokimiyatlariga taqdim etadi”, deyiladi vazirlik xabarida.
Avvalroq Ukraina prezidenti Vladimir Zelenskiy mamlakat mudofaa byudjetini 500 milliard grivnaga (taxminan 12 mlrd dollar) oshirish haqidagi qonunni imzolagani haqida xabar berilgandi.
“Ukrainaning harbiy byudjeti 3,73 trillion grivnani tashkil etadi, bu Rossiya tomonidan boshlangan keng ko‘lamli urushdan avval tasdiqlangan byudjetdan 2,3 baravar ko‘pdir”, dedi Oliy Rada deputati Yaroslav Jeleznyak.
Shuningdek, 20-sentyabr kuni Yevrokomissiya rahbari Ursula fon der Lyayenning Kiyevga tashrifi davomida Ukrainaning vayron bo‘lgan energetika infratuzilmasini tiklashga 100 million yevro ajratilishi ma’lum qilingandi.
Izoh (0)