Yaponiya Ukrainadagi harbiy amaliyot tufayli sanksiyalar doirasida Rossiyadan neft importini bosqichma-bosqich to‘xtatadi, deya ma’lum qildi Yaponiya bosh vaziri Fumio Kisida G7 sammitida. Bu haqda RBK xabar bermoqda.
Biz importni odamlar hayoti va biznesiga salbiy ta’sirlarni kamaytirgan tarzda bosqichma-bosqich to‘xtatish choralarini ko‘ramiz, — dedi u.
Yaponiya mamlakat energiya iste’molining qariyb 90 foizini import qiladi, Rossiya esa mamlakatga suyultirilgan gaz yetkazib berish bo‘yicha beshinchi o‘rinda turadi.
“Saxalin-1”ga Yaponiya Iqtisodiyot, savdo va sanoat vazirligi, Itochu va Marubeni savdo kompaniyalari, neft qazib oluvchi Japan Petroleum Exploration Company (Japex) va boshqalar kiradi.
“Saxalin-2” aksiyadorlari orasida Yaponiyaning Mitsui va Mitsubishi kompaniyalari bor, ular mos ravishda 12,5 va 10 foiz ulushga ega.
Iqtisodiyot vaziri Koichi Xagiuda avvalroq Yaponiyaning “Saxalin-2”dagi o‘rnini boshqa davlat egallashidan qo‘rqib, uni tark etmasligini aytgan edi. Bloomberg ma’lumotlariga ko‘ra, Xitoy kompaniyalari Tokio ulushiga qiziqish bildirgan.
Bir kun oldin AQSH Oq uyi G7ning barcha davlatlari (AQSH va Yaponiyadan tashqari, assotsiatsiyaga Germaniya, Fransiya, Buyuk Britaniya, Italiya va Kanada kiradi) Rossiya neft importidan bosqichma-bosqich voz kechishga yoki kamaytirish uchun embargo joriy etishga kelishib olganini e’lon qildi.
G7 qo‘shma bayonotida aytilishicha, jarayon muqobil eksportchilardan maqbul narxlarda yetkazib berish kafolati bilan o‘z vaqtida va tartibli amalga oshiriladi. Bunga, jumladan, qazib olinadigan yoqilg‘iga qaramlikni kamaytirish va toza energiyaga o‘tish orqali erishish rejalashtirilgan.
8-mart kuni Qo‘shma Shtatlar Ukraina bo‘yicha sanksiyalar doirasida Rossiyadan neft va boshqa energetika mahsulotlarini import qilishni taqiqladi. Buyuk Britaniya ham xuddi shunday qadam tashladi.
May oyi boshida Yevropa Ittifoqi tomonidan Rossiyaga qarshi neft embargosi joriy etilgani haqida Yevrokomissiya rahbari Ursula fon der Lyayen e’lon qilgan edi. Uning ta’kidlashicha, Yevropa davlatlari olti oy ichida xom neft yetkazib berishni to‘xtatish, 2022 yil oxiriga kelib esa Rossiyadan neft mahsulotlarini sotib olishni butunlay to‘xtatish niyatida.
Avvalroq Vengriya bosh vaziri Viktor Orban Yevropa Ittifoqining Rossiya neftini taqiqlash bo‘yicha so‘nggi taklifini rad etib, bu uning mamlakati iqtisodiyotiga yadro bombasi otilishi bilan barobar ekanini aytgani haqida xabar berilgan edi.
Izoh (0)