Yevropa komissiyasi rahbari Ursula fon der Lyayen 20-sentyabr kuni ertalab Kiyevga tashrif buyurdi.
Germaniyaning MDR ijtimoiy-huquqiy media kompaniyasi xabariga ko‘ra, fon der Lyayen Ukraina prezidenti Vladimir Zelenskiy bilan qishda mamlakatni energiya bilan ta’minlash uchun Yevropa Ittifoqining (YI) Kiyevga ko‘rsatadigan yordamini muhokama qilmoqchi.
Xususan, YI Rossiya hujumi oqibatida uylarini tashlab ketishga majbur bo‘lgan ukrainaliklarni isitish va boshpanasi uchun to‘lashga 60 million yevro ajratmoqchi. Yana 100 million yevro urush oqibatida Ukrainadagi vayron bo‘lgan energetika infratuzilmasini tiklashga mo‘ljallangan.
Qayd etilishicha, Rossiya hujumlari tufayli Ukrainada ishlab chiqarilgan elektr quvvati hajmi 9 gigavattga kamaygan.
Xalqaro energetika agentligi (XEA) ma’lumotlariga ko‘ra, Rossiya-Ukraina urushi boshlanganidan beri Ukrainaning elektr energiya ishlab chiqarish qobiliyati Rossiya tomonidan vayron qilingan infratuzilma tufayli uchdan ikki qismga kamaygan.
YI Ukrainaga qish mavsumini yengib o‘tish uchun insonparvarlik yordami sifatida ajratadigan 160 million yevro Rossiyaning YI hududida muzlatilgan aktivlaridan tushadigan mablag‘dan taqdim etiladi.
Moliyaviy yordamdan tashqari, YI Kiyevga shikastlangan energetika infratuzilmasini tiklash va mamlakatga qo‘shimcha elektr energiyasi yetkazib berishda yordam beradi. Bundan tashqari, Litvada qazib olinadigan yoqilg‘i elektr stansiyasi demontaj qilinadi va Ukrainaga ko‘chiriladi.
Izoh (0)