Ilon Mask Yevropa davlatlarining amaldagi hokimiyatlarini tanqid qilish orqali Yevropa ittifoqining raqamli qonunchiligini buzmayapti. Bu haqda Yevropa komissiyasi vakili Tomas Renye Bryusseldagi matbuot anjumanida aytib o‘tdi.
“Fikr erkinligi bizning raqamli aktimizning asosini tashkil etadi. Har kim o‘z fikrini bildirish huquqiga ega. Bu Ilon Maskka ham tegishli”, dedi u jurnalistlar savollariga javob berar ekan.
Tomas Renyening eslatishicha, Yevrokomissiya Mask o‘zining X ijtimoiy tarmog‘idagi yozuvlarini maxsus yo‘llar bilan foydalanuvchilarga targ‘ib qilgan yoki yo‘qligini tekshirmoqda, bu raqamli hamjamiyat standartlarini buzishi mumkin.
Avvalroq Ilon Mask Britaniya bosh vaziri Key Starmer iste’foga chiqishi va sudga tortilishi kerakligini aytgan edi. Tesla va Space X asoschisining so‘zlariga ko‘ra, Starmer o‘nlab yillar davomida Angliya shimolida voyaga etmagan qizlarga nisbatan sodir etilgan jinsiy jinoyatlarda sherik hisoblanadi.
Welt am Sonntag gazetasida chop etilgan maqolasida Mask Germaniyaning kelajagi iqtisodiy va madaniy tanazzul yoqasida qolayotgani, “Germaniya uchun muqobil” (AfD) partiyasi esa “umidning so‘nggi uchquni” ekanligi haqida fikr bildirdi.
Bundan oldin tadbirkor X ijtimoiy tarmog‘idagi sahifasida “Faqat AfD Germaniyani qutqara oladi” deb yozgan edi. Germaniyada bunday qo‘llab-quvvatlash boshqa partiyalarning g‘azabi va tanqidiga sabab bo‘ldi va hukumat vakili Kristian Xofman Maskning AfDga ovoz berishga chaqirishlarini saylov kurashiga aralashishga urinish deb atadi.
Izoh (0)