YI Rossiya aktivlaridan ilk 1,5 mlrd yevro daromad ajratmoqda

26-iyul kuni Yevropa Ittifoqi (YI) Rossiyaning muzlatilgan aktivlaridan olingan dastlabki 1,5 milliard yevro daromadni Ukrainani qo‘llab-quvvatlash uchun yubormoqda. Bu haqda Yevrokomissiya prezidenti Ursula fon der Lyayyen X tarmog‘ida ma’lum qildi.

YI Ukraina bilan birga. Bugun biz muzlatilgan Rossiya aktivlaridan 1,5 milliard yevroni Ukrainani mudofaa va rekonstruksiya qilish uchun o‘tkazmoqdamiz. Kreml pullaridan Ukraina va butun Yevropani yashash uchun xavfsizroq joyga aylantirishda foydalanish eng munosib qarordir, deyiladi bayonotda.

YI bayonotida aytilishicha, blok Ukrainani qo‘llab-quvvatlash uchun Rossiyaning muzlatilgan aktivlaridan olingan 1,5 milliard yevro miqdoridagi birinchi to‘lovni ajratgan. YI operatorlari va markaziy qimmatli qog‘ozlar depozitariylari tomonidan olingan ushbu tushumlar 23-iyul kuni Euroclear’dan dastlabki to‘lov sifatida taqdim etilgan.

Ma’lum bo‘lishicha, Ukraina bu pulni to‘g‘ridan-to‘g‘ri olmaydi, u Yevropa tinchlik jamg‘armasi va Ukraina jamg‘armasi orqali Ukrainaning harbiy salohiyatini qo‘llab-quvvatlash, shuningdek, mamlakatni qayta tiklashni qo‘llab-quvvatlash uchun yo‘naltiriladi.

YI oliy vakili Josep Borrelning qo‘shimcha qilishicha, bu pullar evaziga YI ustuvor harbiy texnika sotib olishni moliyalashtirish, shuningdek, Ukraina ishlab chiqarishini qo‘llab-quvvatlashni rejalashtirmoqda.

Rossiyaning muzlatilgan aktivlari

Avvalroq Belgiyaning Euroclear depozitariysi Rossiya aktivlaridan Ukrainaga tushadigan daromadning birinchi transhini e’lon qilgan edi. Iyul oyida 1,55 milliard yevro miqdoridagi hissa va’da qilingan. Yevrokomissiya vakili Kristian Vigand ham yaqin haftalarda Rossiyaning muzlatilgan aktivlaridan tushgan daromadning birinchi miqdorini Ukrainaga harbiy yordam uchun o‘tkazishini aytgan.

Ukraina mudofaa vaziri Rustem Umerovning so‘zlariga ko‘ra, Rossiyaning muzlatilgan aktivlari bo‘yicha foizlarning umumiy miqdori yiliga taxminan 2,5-3 milliard yevroni tashkil qiladi. Ular birinchi navbatda pulni o‘q-dorilar, havo hujumidan mudofaa tizimlari va Ukraina ishlab chiqaruvchilarini qo‘llab-quvvatlashga sarflashni rejalashtirmoqda.