Yevroparlamentning 705 nafar a’zosidan 63 nafari Yevropa komissiyasi (YK) prezidenti Ursula fon der Lyayen, Yevropa kengashi prezidenti Sharl Mishel va Yevroparlament rahbari Roberta Metsolaga murojaat qildi.
Bayonotda Yevroparlament deputatlari mamlakat bosh vaziri Viktor Orbanning Rossiya va Xitoyga tashrifi munosabati bilan Vengriyaning Yevropa kengashidagi ovoz berish huquqini to‘xtatib qo‘yishga chaqirmoqda, deb yozadi Politico. Vengriya 1-iyuldan boshlab joriy yilning oxirigacha YI kengashiga raislik qildi.
“Bu Vengriyaning YI kengashidagi ovoz berish huquqini to‘xtatib turish kabi haqiqiy harakatlarni talab qiladi, chunki amaliyot oddiy tanbeh ish bermasligini ko‘rsatdi”, deya maktub matnidan iqtibos keltiradi Politico.
Nashr ixtiyorida bo‘lgan maktubda aytilishicha, Vengriya bosh vaziri tashriflari chog‘ida “o‘z vakolatlarini ataylab buzib ko‘rsatgan”.
Deputatlarning so‘zlariga ko‘ra, u o‘z safarlari bilan “kengash raisi lavozimini suiiste’mol qilib, allaqachon katta zarar yetkazgan”. Nashrning yozishicha, tashabbusni Yevropa xalq partiyasi, “Yangilanish”, “So‘l” va “Yashillar” vakillari qo‘llab-quvvatlagan. Bundan tashqari, Bild eslatishicha, kecha, 15-iyul kuni Yevrokomissiya o‘z komissarlaridan Vengriyaning YI kengashiga raisligi davrida vazirlarning norasmiy uchrashuvlarida qatnashmaslikni so‘ragan.
Iyul oyi boshida Viktor Orban Kiyevga tashrif buyurib, Ukraina prezidenti Vladimir Zelenskiy bilan uchrashdi va u bilan o‘t ochishni to‘xtatish imkoniyatini muhokama qildi. Shundan so‘ng Vengriya bosh vaziri Rossiya prezidenti Vladimir Putin bilan uchrashish uchun Moskvaga, keyinroq esa Xitoyga keldi. Orban bu tashriflarni tinchlikka erishish missiyasining bir qismi deb atadi. Yevropa Ittifoqining yuridik xizmati Viktor Orbanning Moskvaga safarini kelishuvlarni buzish deb hisobladi.
Shundan so‘ng Orban Yevropa parlamentining birinchi yalpi majlisida so‘zga chiqishga taklif qilinmadi. “Yangilanish” fraksiyasi vakili Klara de Meloga ko‘ra, Vengriya bosh vaziri Yevropa Ittifoqi qoidalarini hurmat qilmaydi. Bundan tashqari, YK rahbari Ursula fon der Lyayen YI kengashining Vengriyaga tashrifini bekor qildi.
Izoh (0)