Futbol bo‘yicha O‘zbekiston milliy terma jamoasi 20-mart kuni Toshkentdagi “Bunyodkor” stadionida Jahon chempionati saralashidan o‘rin olgan uchrashuvlar doirasida Qirg‘izistonga qarshi bahs olib boradi.
Ushbu o‘yin oldidan har ikki terma jamoaning hozirgi holati, JCHga chiqish imkoniyatlari va tarkibidagi eng qimmat futbolchilari haqida so‘z boradi.
Toshkent. “Bunyodkor” stadioni.
20-mart, payshanba
Jahon chempionati 3-saralash bosqichi
O‘zbekiston — Qirg‘iziston 21:00
Bosh hakam: Yusuke Araki (Yaponiya)
O‘zbekiston
O‘zbekiston milliy jamoasi 2026-yil bo‘ladigan futbol bo‘yicha Jahon chempionatiga chiqish uchun yaxshi imkoniyatga ega. A guruhidan joy olgan “oq bo‘rilar” 13 ochko bilan 2-o‘rinni egallab turibdi. 6 uchrashuvdan keyin o‘zbekistonliklar 4 g‘alaba, 1 durang va 1 mag‘lubiyat qayd etgan. Jamoa hozirgacha raqiblar darvozasiga 8 marta gol kiritgan bo‘lsa, 5 bora o‘z darvozasidan to‘p olib chiqqan.
O‘zbekiston termasi sloveniyalik murabbiy Srechko Katanes boshchiligida maydonga tushib kelayotgan edi. Biroq 22-yanvar kuni uning sog‘lig‘ida muammolar chiqib, terma jamoa postidan ketdi. Uning o‘rniga o‘zbek futbol muxlislariga yaxshi tanish bo‘lgan Temur Kapadze tayinlandi. Milliy jamoa Kapadze bilan bir o‘rtoqlik uchrashuvi o‘tkazishga ham ulgurdi. 27-yanvar kuni Qatarda yig‘in o‘tkazgan ”oq bo‘rilar” Iordaniyaga qarshi maydonga tushdi va 0:0 hisobida durang o‘ynadi.
O‘zbekiston terma jamoasida 2 ta yo‘qotish bor. Turkiya chempionatida o‘ynaydigan legionerlar Azizbek Turg‘unboyev va Husniddin Aliqulov martdagi yig‘inni jarohat sabab o‘tkazib yuboradi.
Qirg‘iziston
Qirg‘iziston terma jamoasining JCHga chiqish imkoniyati pastroq baholanmoqda. “Oq lochinlar” 6 uchrashuvdan keyin 3 ochko to‘plashni uddaladi. Ular yagona g‘alabasini o‘z maydonida Shimoliy Koreya ustidan qo‘lga kiritgan. Qolgan barcha bahslarda imkoniyatni boy bergan. Qirg‘izlar o‘tgan bahslarda 6 marta gol urishni uddalagan bo‘lsa, 13 bora o‘z darvozasidan to‘p o‘tkazib yuborgan.
Jamoa oxirgi uchrashuvni 2024-yilda Eronga qarshi o‘tkazgan va 2:3 hisobida imkoniyatni boy bergan.
O‘zaro uchrashuvlar tarixi
O‘zbekiston va Qirg‘iziston hozirgacha 8 marta to‘qnash kelgan va barchasida “oq bo‘rilar” g‘alaba qozongan. Ushbu bahslarda eng yirik hisob 2007-yilda qayd etilgan, unda O‘zbekiston 6:0 hisobida g‘alaba qozongan. Jamoalar o‘rtasidagi oxirgi bahs 2024-yilning 9-sentyabr kuni o‘tkazilgan va unda o‘zbekistonliklar 3:2 hisobida raqibidan ustun kelgan.
Barcha uchrashuvlarda qayd etilgan natijalar:
- Qirg‘iziston — O‘zbekiston 0:6
- O‘zbekiston — Qirg‘iziston 4:0
- Qirg‘iziston — O‘zbekiston 0:3
- O‘zbekiston — Qirg‘iziston 5:0
- O‘zbekiston — Qirg‘iziston 3:1
- O‘zbekiston — Qirg‘iziston 3:1
- Qirg‘iziston — O‘zbekiston 1:4
- Qirg‘iziston — O‘zbekiston 2:3
To‘plar nisbati ham O‘zbekiston tomonda — jamoa 8 uchrashuvda 31 marta qirg‘izlar darvozasini ishg‘ol qilgan, 5 marta o‘z darvozasidan gol o‘tkazib yuborgan.
Transfermarkt ma’lumotlariga ko‘ra, O‘zbekiston terma jamoasining umumiy qiymati 70 million yevroni tashkil qiladi. Kapadze shogirdlari safida harakat qiladigan eng qimmat futbolchi — “Manchester Siti” a’zosi Abduqodir Husanov hisoblanadi. Uning Transfermarkt nashridagi qiymati 35 million yevro etib belgilangan. Keyingi o‘rindan “SSKA” a’zosi Abbosbek Fayzullayev joy olgan. Futbolchining narxi 8 million yevroga baholangan. O‘zbekiston terma jamoasining eng qimmat uchinchi futbolchisi esa Eldor Shomurodov hisoblanadi. “Roma” klubi hujumchisining hozirgi kundagi narxi 4 million yevroni tashkil qiladi.
O‘zbekiston terma jamoasining eng qimmat 10 futbolchisi:
- Abduqodir Husanov — 35 million yevro;
- Abbosbek Fayzullayev — 8 million yevro;
- Eldor Shomurodov — 4 million yevro;
- Oston O‘runov — 2,5 million yevro;
- Otabek Shukurov — 1,8 million yevro;
- Jaloliddin Masharipov — 1,8 million yevro;
- Husniddin Aliqulov — 1,7 million yevro;
- Abduvohid Ne’matov — 1,5 million yevro;
- Akmal Mozgovoy — 1,3 million yevro;
- Sherzod Nasrullayev — 1,3 million yevro.
O‘zbekiston Osiyodagi uchinchi eng qimmat terma jamoa hisoblanadi. Ulardan oldingi o‘rinlarda Yaponiya (307 million yevro) va Janubiy Koreya (121,10 million yevro) joy olgan. O‘zbekiston FIFA reytingida 58-o‘rinda egallab turibdi.
Qirg‘iziston terma jamoasining umumiy narxi 7,5 million yevro hisoblanadi. “Oq Lochinlar”ning eng qimmat futbolchisi — Guljigit Aliqulov. Moskvaning “Torpedo” klubida harakat qiladigan futbolching Transfermarkt nashridagi narxi 800 ming yevroga baholangan. Samarqandning “Dinamo” klubi sobiq futbolchisi, hozirgi kunda Eronning “Istiqlol” jamoasida o‘ynayotgan Joel Kojo qirg‘izistonliklarning ikkinchi eng qimmat futbolchisi bo‘lib turibdi. Uning narxi Transfermarkt portalida 700 ming yevro etib ko‘rsatilgan. Indonezyaning “Persita” jamoasida o‘ynaydigan Tamirlan Kozubayev esa kuchli uchlikka yakun yasagan. Uning transfer narxi 500 ming yevro hisoblanadi.
Qirg‘iziston terma jamoasining eng qimmat 10 futbolchisi:
- Guljigit Aliqulov — 800 ming yevro
- Joel Kojo — 700 mimg yevro
- Tamirlan Kozubayev — 500 ming yevro
- Eldiyor Zaripbekov — 450 ming yevro
- Kristian Brauzman — 450 ming yevro
- Alimardon Shukurov — 450 ming yevro
- Kayrat-Jirgalbek — 350 ming yevro
- Valeriy Kichin — 350 ming yevro
- Erjon Tokotayev — 300 ming yevro
- Erbol Ataboyev 275 ming yevro
Qirg‘iziston terma jamoasi Osiyodagi eng qimmat 20-terma jamoa hisoblanadi. FIFA reytingida 107-pog‘onadan joy olgan.
Ma’lumot uchun, O‘zbekiston — Qirg‘iziston terma jamoalari o‘rtasidagi bahs 20 mart, soat 21:00 da boshlanadi. Uchrashuv Toshkentdagi “Bunyodkor” stadionida bo‘lib o‘tadi.
Izoh (0)