O‘zbekistonda so‘nggi ikki oyda o‘tkazilgan tekshiruvlarga ko‘ra, umra litsenziyasiga ega bo‘lmasdan ushbu xizmatni ko‘rsatayotgan 31 ta sayyohlik firmasi mas’ullariga nisbatan jinoyat ishi qo‘zg‘atildi.
Din ishlari bo‘yicha qo‘mita matbuot xizmatining bildirishicha, ular Jinoyat kodeksining 168-moddasi (firibgarlik) bilan ayblanmoqda.
So‘nggi ikki oyda “Litsenziyalash, ruxsat berish va xabardor qilish tartib-taomillari to‘g‘risida”gi qonun talablari asosida umra faoliyatini litsenziyasiz amalga oshirgan 24 ta turfirmada tekshiruv o‘tkazilgan bo‘lib, ularning 19 tasi 75 million so‘mdan jarimaga tortilgan (5 tasi “Reklama to‘g‘risida”gi qonunchilikka asosan Raqobat qo‘mitasiga va huquqni muhofaza qiluvchi organlarga qonuniy ko‘rib chiqish uchun yuborilgan).
Qonunchilikka ko‘ra, umra tadbirlarini tashkil etish va o‘tkazishga oid xizmatlarni litsenziyaga ega bo‘lmagan tadbirkorlik subyektlari tomonidan ko‘rsatish taqiqlangan. Shuningdek, fuqarolarni umra amallarini bajarish uchun Saudiya Arabistoni podshohligiga umra vizasisiz yuborish taqiqlanadi.
Umra safariga borishdan oldin har qanday turfirmaning Din ishlari bo‘yicha qo‘mita tomonidan taqdim etilgan “Umra litsenziyasi” mavjudligini surishtirib olishingizni tavsiya qilamiz. Noqonuniy turfirma yoki turagentlardan ogoh bo‘ling, deyiladi qo‘mita xabarida.
Qo‘mita umra ziyoratini tashkil etish huquqiga faqatgina O‘zbekiston musulmonlari idorasi huzuridagi Haj-umra markazi va 12 ta vakolatli sayyohlik kompaniyalari ega ekanligini eslatib o‘tdi: Ihlos travel 1, Yuksak travel Air, Muhtasham travel, Musaffo turizm xizmati, Risola travel lux, Xorazm umra jamiyati, Hikmat Umra Travel, Real Dreams, Travel with family, Sofa Marva tour, B Management va Safar time exclusive.
O‘zbekistonda umra tadbirlarini tashkil etish
2024-yil iyulida O‘zbekistonda umra tadbirlarini tashkil etish va o‘tkazish litsenziyalanadigan faoliyatning alohida turi sifatida belgilandi. Hukumat qarori bilan quyidagi litsenziya talab va shartlari joriy etilgan. Litsenziyaga ega bo‘lmagan tadbirkorlik subyektlari tomonidan umra xizmatlarini ko‘rsatganlik uchun yuridik shaxslarga solinadigan jarimalar miqdorlari BHMning 200 baravari (75 million so‘m) etib belgilangan.
Izoh (0)