Ижтимоий тармоқларда Ўзбекистон ва Афғонистон чегарасидаги ҳудуд осмонини қора тутун қоплагани акс этган видеолар тарқалди. Сурхондарё вилояти ҳокимлиги ҳолатга изоҳ берди.
Унга кўра, Ўзбекистон ва Афғонистон давлатлари чегарасидаги нейтрал ҳудудда, Амударё ичкарисида жойлашган кичик оролчаларда қамишзорларни режали тартибда ёқиш ишлари амалга оширилмоқда.
Мазкур тадбир зарарли ҳашаротлар кўпайиши ва юқумли касалликлар тарқалишининг олдини олиш мақсадида мутасадди идораларнинг рухсати ва масъул органларнинг ўзаро келишуви асосида олиб борилмоқда. Ёнғин ҳаракатлари ва уларнинг кўлами тўлиқ назорат қилинмоқда.
Ушбу тадбир белгиланган режага мувофиқ ва хавфсизлик чораларига риоя этган ҳолда амалга оширилаётгани маълум қилинди.
Фуқаролардан вазият бўйича ортиқча ваҳимага берилмаслик, ижтимоий тармоқ фойдаланувчиларидан эса аҳоли ўртасида ваҳима келтириб чиқарувчи асосланмаган ахборот тарқатмаслик сўралди.
Ўзбекистон—Афғонистон савдо айланмасини ошириш режаси
Бош вазир Абдулла Арипов 2024 йил августида Кобулга ташрифи давомида ўтказилган музокараларда Афғонистон билан савдо алоқаларини ривожлантириш, энергетика соҳасидаги самарали ҳамкорлик алоқаларини янги босқичга олиб чиқиш, мис, темир, нефть-газ конларини биргаликда ўзлаштириш лойиҳаларини амалга ошириш, шунингдек, транспорт-логистика, қишлоқ ва сув хўжалиги, таълим, ҳудудлараро муносабатларни янада чуқурлаштириш юзасидан фикр алмашилганди. Ўзаро савдо айланмасини 2024 йилда 1 миллиард долларга, яқин истиқболда эса 3 миллиард долларга етказиш бўйича барча имкониятлар мавжудлиги таъкидланганди.
Афғонистон савдо вазири Нуруддин Азизий ҳам Ўзбекистон билан савдо ҳажмини йилига 3 миллиард долларга етказиш бўйича ишлар олиб борилаётгани айтганди.
2025 йил 22 февраль куни Тошкентда Абдулла Арипов “Толибон” бош вазирининг иқтисодий масалалар бўйича ўринбосари Абдул Ғани Бародар билан икки томонлама музокаралар ўтказди. Учрашувда ўзаро манфаатли алоқаларни янада кенгайтириш, савдо-иқтисодий, энергетика, транспорт ва бошқа соҳаларда ҳамкорликни ривожлантириш масалалари юзасидан фикр алмашилди.
Шу куни Абдул Ғани Бародар Ўзбекистон бош вазири ўринбосари Жамшид Хўжаев билан ҳам учрашди. Учрашувда савдо-транзит алоқаларини кенгайтириш, ўзбекистонлик инвесторларнинг Афғонистонга инвестиция киритиши масалалари муҳокама қилинди. Ўзбекистон томони икки томонлама савдо алоқаларини фаоллаштириш мақсадида икки давлат чегарасида қўшма савдо зонасини ташкил этишга тайёрлигини айтган.
Изоҳ (0)