Qirg‘iziston Milliy xavfsizlik qo‘mitasi rahbari Qamchibek Tashiyev deputatlarga Tojikiston va O‘zbekiston chegaralari bilan tutashgan nuqtani ko‘rsatdi. U mazkur masala bo‘yicha 2007-yildan beri uch tomonlama muzokaralar olib borilayotganini aytdi. Bu haqda “AKIpress” xabar berdi.
Tashiyevning so‘zlariga ko‘ra, bugungacha hukumat delegatsiyalari 6 marta uchrashgan.
Tomonlar chegaralarning tutashgan nuqtasi bo‘yicha kelishuvga erisha olmagan edi. 2025-yil mart oyida Qirg‘iziston-Tojikiston chegarasi to‘g‘risidagi shartnoma imzolangandan so‘ng, Dushanbe shahrida uch tomonlama uchrashuv bo‘lib o‘tdi, unda uch davlat kelishuvga erishdi va uch chegaraning tutash nuqtasini belgilab oldi, dedi u.
Qirg‘iziston Milliy xavfsizlik qo‘mitasi rahbari xaritada tutashish nuqtasi qayerda ekanini ko‘rsatdi.
Ko‘k rangda uchta chegaraning tutashgan nuqtasi ko‘rsatilgan. Avvalroq yashil rang bilan belgilangan joyni Tojikiston, qizil rang bilan esa O‘zbekiston taklif qilgandi. Ular bu joylarni tutashish nuqtasi sifatida taklif qilishgan. Agar rozi bo‘lganimizda, barcha yo‘llar mamlakatimiz tashqarisida qolgan bo‘lardi. Taxminan 100 gektar yer Qirg‘iziston hududida qoldi, bu ham bizning g‘alabamiz hisoblanadi. Bu yerda odamlar yashashmaydi, ammo bu bizning hududimiz va undan yo‘limiz o‘tadi, deya ta’kidladi u.
13-mart kuni Qirg‘iziston prezidenti Sadir Japarov va Tojikiston prezidenti Emomali Rahmon ikki mamlakat o‘rtasidagi Davlat chegarasi to‘g‘risidagi bitimni imzoladi. Qirg‘iziston—Tojikiston chegarasining umumiy uzunligi 1 ming 6,84 kilometrni tashkil etadi, shundan 519,9 kilometri 2011-yilgacha, 486,94 kilometri esa so‘nggi uch yil ichida aniqlangan. O‘nlab bahsli uchastkalar tufayli u yerda vaqti-vaqti bilan qurolli to‘qnashuvlar yuz berib turardi.
8-yanvar kuni O‘zbekiston, Qirg‘iziston va Tojikiston hukumatlari rahbarlari uch tomonlama uchrashuv o‘tkazdi. Tomonlar o‘rtasida davlat chegaralari masalalari bo‘yicha ilgari erishilgan kelishuvlarga oid muzokaralar bo‘lib o‘tdi. Qirg‘iziston Xitoy, Qozog‘iston, Tojikiston va O‘zbekiston bilan chegaradosh. Xitoy va Qozog‘iston bilan chegara bo‘yicha barcha bahsli masalalar bir necha yil oldin hal qilingan.
Izoh (0)