O‘zbekiston terma jamoasi va Angliyaning “Manchester Siti” klubi futbolchisi Abduqodir Husanovning transfer narxi oshdi. Transfermarkt nashri ma’lumotlariga ko‘ra, himoyachi 35 million yevroga baholanmoqda.
Hozirda Abduqodir Husanov dunyodagi eng qimmat futbolchilar reytingida 199-o‘rinda turibdi. Himoyachi bu ko‘rsatkich borasida Angliya chempionatida 90-pog‘onani egallagan. “Manchester Siti” tarkibidagi 12 nafar futbolchi Husanovdan qimmatroqqa baholangan bo‘lsa, u dunyodagi eng qimmat markaziy himoyachilar reytingida 39-o‘rinni egallagan. Shuningdek, Abduqodir 2004-yilda tug‘ilgan futbolchilar orasida kuchli o‘nlikka kirgan.
Abduqodir Husanov Osiyo qit’asining eng qimmat futbolchilari reytingida ham yuqoriladi. Futbolchi hozirda Mitoma, Kim Min Jae, Kubo kabi futbolchilardan keyin 4-o‘rinni egallab turibdi.
Osiyoning eng qimmat 5 futbolchisi:
- Kaoru Mitoma (“Brayton”) — 45 million yevro
- Kim Min Jae (“Bavariya”) — 45 million yevro
- Takefusa Kubo (“Real Sosyedad”) — 40 million yevro
- Abduqodir Husanov (“Manchester Siti”) — 35 million yevro
- Kang In Lee (“PSJ”) — 30 million yevro
E’tiborli tomoni shundaki, Osiyoning 3 karra eng yaxshi futbolchisi Son Xyon Min 30 million yevroga baholangan. “Tottenhem” hujumchisining oldingi narxi 38 million yevro edi.
Yangilangan narxdan keyin O‘zbekiston terma jamoasining umumiy qiymati 70 million yevroga yetdi. Bu ko‘rsatkich bo‘yicha, “oq bo‘rilar” Osiyo qit’asida 3-o‘rinni egallab turibdi. O‘zbekistondan yuqorida 2 ta terma jamoa bor — Yaponiya va Janubiy Koreya.
Osiyoning eng qimmat 5 terma jamoasi:
- Yaponiya — 306 million yevro
- Janubiy Koreya — 134,10 million yevro
- O‘zbekiston — 70 million yevro
- Eron — 46,30 million yevro
- Birlashgan Arab Amirligi — 44,35 million yevro
E’tiborli tomoni shundaki, hozirda Abduqodir Husanov Osiyoning bir qancha nomdor terma jamoalaridan qimmatroqqa baholanmoqda. Misol tariqasida, Saudiya Arabistoni terma jamoasining umumiy qiymati 30,65 million yevro hisoblanadi. Shuningdek, Avstraliya (23,75 million yevro), Qatar (23,23 million yevro), Iroq (13,98 million yevro), Iordaniya (13,55 million yevro) va Xitoy (13,33 million yevro) kabi jamoalarning narxi ham Husanovdan pastroqqa baholangan.
O‘zbekiston terma jamoasi Markaziy Osiyoda ham yaqqol yetakchilik qilmoqda.
Markaziy Osiyoda:
- O‘zbekiston - 70 mln yevro
- Qozog‘iston - 13.33 mln yevro
- Tojikiston - 8.98 mln yevro
- Qirgiziston - 7.15 mln yevro
- Turkmaniston - 2.98 mln yevro
- Afg‘oniston - 825 ming yevro
Markaziy Osiyodagi O‘zbekistondan tashqari qolgan jamoalarning umumiy narxi 33,20 million yevro ekanligini hisobga olsak, Husanov ushbu jamoalarning barchasining narxini qo‘shib hisoblaganda ham qimmatroq ekanini ko‘rish mumkin.
Izoh (0)