Afg‘onistonning Mozori Sharif shahrida O‘zbekiston savdo uyi ochilmoqda, deb xabar berdi Savdo-sanoat palatasi matbuot xizmati.
Unga ko‘ra, ushbu savdo uyi 220 kvadrat metr maydonda joylashgan bo‘lib, tadbirkorlarga mahsulotlarini Afg‘oniston bozoriga chiqarish, hamkorlar topish va eksportni kengaytirish uchun qulay platforma yaratadi. Unda farmatsevtika, elektrotexnika va qurilish materiallari uchun doimiy faoliyat yurituvchi shourum va omborxona mavjud.
Tashrif doirasida Savdo-sanoat palatasi raisi Davron Vahobov savdo uyidan tashqari, Afg‘onistonning Baglan viloyatidagi Nasaji Textile Factory to‘qimachilik fabrikasida ham bo‘ldi va qo‘shma kooperatsiya, eksport va import masalalarini muhokama qildi.
Nasaji Textile Factory — Afg‘onistonning eng yirik va qadimiy to‘qimachilik korxonalaridan biri bo‘lib, paxtadan ip-kalava, gazlamalar va tayyor mahsulotlar ishlab chiqaradi. Ayni paytda fabrikada 350 dan ortiq xodim ishlamoqda va ishlab chiqarish hajmi bosqichma-bosqich oshirilmoqda. Fabrika mahalliy bozor bilan birga xalqaro eksportga ham yo‘naltirilgan.
Uchrashuv davomida fabrika bilan qo‘shma kooperatsiya yo‘lga qo‘yilishi, o‘zaro tajriba almashish va ishlab chiqarish hajmini oshirish imkoniyatlari muhokama qilindi. Tayyor va yarim tayyor to‘qimachilik mahsulotlarini eksport qilish, shuningdek, paxta tolasi va ip-kalavani O‘zbekistonga import qilish yuzasidan kelishuvga erishildi.
Davron Vahobov Baglan Sugar Company shakar zavodiga ham tashrif buyurdi. 1938-yilda tashkil etilgan mazkur korxona Afg‘onistondagi eng yirik shakar ishlab chiqaruvchi korxonalardan biri hisoblanadi.
Uchrashuv davomida ishlab chiqarish jarayonlari, texnologik imkoniyatlar va qo‘shma hamkorlik yo‘nalishlari muhokama qilindi. Shuningdek, shakar mahsulotlarini O‘zbekistonga eksport qilish va zavod uchun zarur xomashyoni import qilish masalalari bo‘yicha fikr almashildi.
Tashrif doirasida ikki tomonlama hamkorlikni mustahkamlash va shakar sanoatidagi savdo-sotiq aloqalarini kengaytirish yuzasidan kelishuvlarga erishildi.
Avvalroq O‘zbekiston va Afg‘oniston o‘zaro savdo hajmini 3 milliar dollarga yetkazmoqchiligi haqida xabar berilgan edi. 1-mart kuni O‘zbekiston investitsiyalar, sanoat va savdo vaziri Laziz Qudratov “Termiz” xalqaro savdo markaziga tashrif buyurgan Afg‘oniston savdo vaziri Nuruddin Aziziy boshchiligidagi delegatsiya bilan bu borada aniq chora-tadbirlarni belgilab oldi.
Izoh (0)