O‘zbekiston Yevropa ittifoqi tomonidan moliyalashtiriladigan telekommunikatsiya sohasidagi ikki strategik loyiha bo‘yicha kelishuvlarga erishdi. Bu haqda Yevropa ittifoqining mamlakatdagi vakolatxonasi matbuot xizmati xabar berdi.
18-mart kuni Toshkentda bo‘lib o‘tgan imzolash marosimida xalqaro hamkorlik bo‘yicha Yevropa komissari Yozef Sikela ishtirok etdi.
Birinchisi “Markaziy Osiyo uchun aloqa” (C4CA) loyihasi bo‘lib, mintaqada raqamli infratuzilma va integratsiyani yaxshilashga qaratilgan. U Markaziy Osiyo mamlakatlarini yaxshiroq bog‘lashga, hamkorlik va iqtisodiy almashinuvni rivojlantirishga xizmat qiladi. Raqamli integratsiyani oshirish orqali loyiha iqtisodiy o‘sishni qo‘llab-quvvatlaydi, onlayn xizmatlardan foydalanish imkoniyatlarini yaxshilaydi hamda mintaqadagi raqamli tafovutni bartaraf etishga yordam beradi.
Ikkinchi “Markaziy Osiyoning olis hududlari aholisi uchun sun’iy yo‘ldosh aloqasi” loyihasi —chekka va olis hududlarni yuqori tezlikdagi internet bilan ta’minlashga qaratilgan. Loyiha qishloq va olis hududlar aholisi uchun ta’lim, sog‘liqni saqlash va iqtisodiy rivojlanish sohalarida raqamli imkoniyatlarni kengaytirishga xizmat qiladi.
“Yevropa ittifoqi va O‘zbekiston butun Markaziy Osiyo bo‘ylab internet aloqasini yaxshilash yo‘lida birgalikda ishlamoqda. Yevropa texnologiyalari va O‘zbekistoning tajribasi ko‘proq odamlarga tezkor va xavfsiz internetdan foydalanish imkoniyatini yaratadi, bizneslarni qo‘llab-quvvatlab, yangi ish o‘rinlarini yaratadi hamda mahalliy jamoalar uchun yashash sharoitlarini yaxshilaydi. Raqamli aloqaga sarmoya kiritish orqali biz bo‘shliqlarni to‘ldirmoqdamiz, imkoniyatlar yaratmoqdamiz va Markaziy Osiyo mintaqasining raqamli iqtisodiyotdan to‘liq foyda olishini ta’minlamoqdamiz”, degan Yozef Sikela.
Yakunda tomonlar uchrashuv uchun bir-biriga minnatdorchilik bildirib, o‘zaro manfaatli hamkorlik va yaqin kelajakda qo‘shma loyihalarni muvaffaqiyatli amalga oshirilishiga umid bildirdi.
O‘zbekistonga Yozef Sikela tashrifi
Yevropa ittifoqining xalqaro hamkorlik bo‘yicha komissari Yozef Sikela Yevropa ittifoqi va Markaziy Osiyo hamkorligini rivojlantirish, yangi ish o‘rinlari yaratish va barqaror iqtisodiy o‘sishni kuchaytirishga yo‘naltirilgan Global Gateway (“Global darvoza”) investitsion strategiyasini kengaytirish maqsadsadida 12–18-mart kunlari Markaziy Osiyoga tashrif buyurishi xabar berilgan edi.
O‘zbekistonga u 17-mart kuni keldi. TIV rahbari Baxtiyor Saidov bilan uchrashdi. Unda O‘zbekiston va Yevropa Ittifoqi munosabatlarini yanada mustahkamlash yo‘llarini o‘rganib chiqib, iqtisodiy hamkorlik, sarmoyaviy va mintaqaviy barqarorlikka katta e’tibor qaratildi.
18-mart kuni Sikela Shavkat Mirziyoyev qabulida bo‘ldi. O‘zbekiston bilan Yevropa ittifoqi o‘rtasidagi ko‘p qirrali munosabatlarni yanada rivojlantirishning dolzarb masalalari muhokama qilindi. Uchrashuvda joriy yil aprel oyi boshida Samarqand shahrida “Markaziy Osiyo — YI” birinchi sammiti va Iqlim forumini tashkil etish va o‘tkazish jihatlari ham ko‘rib chiqildi.
Izoh (0)