Senat “O‘zbekiston Respublikasining ayrim qonun hujjatlariga zargarlik sanoatini yanada rivojlantirishga qaratilgan o‘zgartirish va qo‘shimchalar kiritish to‘g‘risida”gi qonunni ko‘rib chiqib, ma’qulladi.
Ushbu qonun loyihasi Oliy Majlis deputatlari tomonidan 2024-yil 11-dekabr kuni birinchi o‘qishda konseptual jihatdan ko‘rib chiqib, qabul qilingandi.
Senatorlarning qayd etishicha, zargarlik sohasida qimmatbaho metallar va toshlar, ulardan yasalgan zargarlik buyumlarning noqonuniy aylanmasi mavjudligi, tadbirkorlik sub’yektlariga mol-mulk va yer solig‘idagi imtiyozlar yetarli emasligi va yana bir qator mavjud muammolar sohadagi salohiyatdan to‘laqonli foydalanish imkonini bermayapti.
Ushbu omillar inobatga olingan holda qonun bilan Ma’muriy javobgarlik to‘g‘risidagi kodeksga va Soliq kodeksiga, “Lisenziyalash, ruxsat berish va xabardor qilish tartib-taomillari to‘g‘risida”gi hamda “Qimmatbaho metallar va qimmatbaho toshlar to‘g‘risida”gi qonunlariga tegishli o‘zgartirish va qo‘shimchalar kiritilmoqda.
Xususan, Ma’muriy javobgarlik to‘g‘risidagi kodeksda qimmatbaho metallar va qimmatbaho toshlar muomalasi va aylanmasi sohasidagi huquqbuzarliklar uchun jarima miqdorlari keskin oshirilmoqda.
Ma’muriy javobgarlik to‘g‘risidagi kodeksda qimmatbaho metallar va toshlardan yasalgan zargarlik buyumlarning noqonuniy aylanmasini kamaytirish, shuningdek qalbaki, asillik darajasiga muvofiq bo‘lmagan zargarlik buyumlari sotilishiga barham berish maqsadida ushbu sohadagi huquqbuzarlik sodir etganlik uchun BHMning 30 baravaridan 50 baravarigacha jarimalar nazarda tutilmoqda.
Soliq kodeksiga kiritilayotgan o‘zgartirishlarga asosan “O‘zbekzargarsanoati” uyushmasining a’zolari bo‘lgan zargarlik buyumlarini ishlab chiqaruvchi yakka tartibdagi tadbirkorlarga nisbatan 2027-yil 1-sentyabrga qadar soliq imtiyozlari tatbiq etilmoqda.
Aynan shu muddatga qadar mazkur tadbirkorlarga ishlab chiqarishda foydalaniladigan yer uchastkalari hamda ko‘chmas mulk ob’yektlari mol-mulk solig‘i va yer solig‘ini to‘lashdan ozod qilinishi nazarda tutilmoqda.
Qayd etilishicha, mazkur qonunning qabul qilinishi zargarlik buyumlarini ishlab chiqaruvchilarni xom ashyo bilan ta’minlanishini yaxshilanishiga, ularning eksport salohiyatini oshirish, soha korxonalarining ishlab chiqarish quvvatlaridan samarali foydalanishni ta’minlash, shuningdek aholining sifatli zargarlik mahsulotlariga bo‘lgan ehtiyojini qanoatlantirish hamda respublika byudjetiga chet el valyutasi va soliq tushumlarining ko‘payishiga xizmat qiladi.
O‘zbekistonda zargarlik sohasi
Shavkat Mirziyoyev 2024-yil iyunida zargarlik sanoatini yanada rivojlantirish, zargarlik buyumlarini ishlab chiqarish va sotish faoliyatini qo‘llab-quvvatlash, tayyor mahsulotlar eksportini oshirishga qaratilgan chora-tadbirlar taqdimotida O‘zbekistonda qazib olinayotgan oltinning atigi 6 foizi qayta ishlanib, bor-yo‘g‘i 78 million dollarlik eksport bo‘layotganini qayd etib, tadbirkorlar uchun alohida sharoitlarga ega zargarlik zonalari tashkil qilinishi, sohaga xomashyo yetkazish, mutaxassis tayyorlash, ishlab chiqarish zanjiri va sotish tizimini butunlay qayta ko‘rib chiqish muhimligini taʼkidlagan edi.
Sohadagi ishlab chiqaruvchilarni qo‘llab-quvvatlash maqsadida “Hunarmand” uyushmasi aʼzolari uchun berilgan imtiyozlar “O‘zbekzargarsanoati” uyushmasiga aʼzo bo‘lgan zargarlik buyumlarini ishlab chiqaruvchi yakka tartibdagi tadbirkorlarga ham tatbiq etish taklif etilgandi.
2024-yil iyulida “Zargarlik buyumlarini ishlab chiqarish sohasini yanada rivojlantirish va ularning raqobatbardoshligini ta’minlash chora-tadbirlari to‘g‘risida”gi prezident farmoni qabul qilindi. Unga ko‘ra, 2024-yil 1-noyabrdan chet elda ishlab chiqarilgan zargarlik buyumlarini, basharti ular bo‘yicha bojxona to‘lovlari amalga oshirilganligini tasdiqlovchi hujjatlar bo‘lmasa, sotuvga qo‘yish va chakana savdoda realizatsiya qilish man etildi. 2027-yil 1-yanvargacha O‘zbekistonga olib kiriladigan tayyor zargarlik buyumlariga nisbatan import bojxona bojlari 20 foizdan 10 foizgacha kamaytiriladi.
Izoh (0)