Faoliyatida kamchiliklarga yo‘l qo‘ygan 151 nafar aybdor shaxsga nisbatan intizomiy jazo chorasi qo‘llanilgan. Bu haqda AOKAda o‘tkazilgan brifingda Davlat xizmatini rivojlantirish agentligi axborot xizmati rahbari ma’lum qildi.
Ta’kidlanishicha, shundan 19 nafari bilan mehnat shartnomasi bekor qilingan. Kambag‘allikni qisqartirish va bandlik vazirligining hududiy bosh boshqarmalari bilan hamkorlikda 236 nafar aybdor shaxsga nisbatan 401 million 900 ming so‘m (401,9 mln so‘m) ma’muriy jarimalar qo‘llanilgan.
2025-yilning yanvar va fevral oylarida respublika va mahalliy ijro etuvchi hokimiyat organlarida faoliyat yuritayotgan jami 7 944 nafar davlat xizmatchilari profilaktik tibbiy ko‘rikdan o‘tkazilgan.
Tibbiyot xodimlarining xulosalari asosida davolanishga ehtiyoji mavjud 1 827 nafar davlat xizmatchilari uchun zarur shart-sharoitlar yaratish choralarini ko‘rish bo‘yicha respublika va mahalliy ijro etuvchi hokimiyat organlariga tegishli xatlar yuborilgan.
Davlat xizmatini rivojlantirish agentligi tomonidan 2024-yilda davlat fuqarolik xizmatchilarining huquqlari va qonuniy manfaatlariga rioya etilishi bilan bog‘liq o‘rganishlar o‘tkazildi va qator ta’sir choralari qo‘llanildi.
O‘zbekistondagi davlat xizmatchilarida korrupsiyaga nisbatan murosasiz munosabatni shakllantirish, ularga “halollik vaksinasi”ni singdirish hamda bu borada preventiv mexanizmlarni joriy etish maqsad qilingan. Bu jamoatchilik muhokamasiga qo‘yilgan 2025-yilga mo‘ljallangan davlat dasturi loyihasida ko‘zda tutilgan.
O‘zbekistonda davlat xizmatchilarining korrupsiyaga moyilligini tekshirish amaliyotini joriy etish taklif etilayotgani haqida avvalroq Korrupsiyaga qarshi kurashish agentligi direktori Akmal Burhonov ma’lum qilgandi.
Izoh (0)