AQSH Markaziy razvedka boshqarmasi (MRB) rahbariyati o‘z xodimlariga imtiyozlar va sakkiz oylik maosh olish sharti bilan ishdan bo‘shashni taklif qildi. Bu haqda The Wall Street Journal xabar berdi.
Amaldorlarning so‘zlariga ko‘ra, bu idorani prezident Donald Trampning ustuvor yo‘nalishlariga, jumladan, Meksika narkokartellariga qarshi kurash va Xitoyga qarshi turishga moslashtirishga urinish hisoblanadi. Yanvar oyi oxirida xuddi shunday taklif federal darajadagi davlat xizmatchilariga ham kelib tushgandi. MRB, ehtimol, ushbu tashabbusni qo‘llagan birinchi razvedka idorasi bo‘lishi mumkin.
Razvedka direktori Jon Retkliff yordamchisiga ko‘ra, boshqarma yangi xodimlarni ishga olishni to‘xtatmoqda, garchi ularning ba’zilari ish uchun dastlabki takliflarni olgan bo‘lsa ham.
“Nomzodlar MRBning yangi maqsadlariga mos tajribaga ega bo‘lmasa, ularning bir qismi lavozimidan ketishi mumkin. Direktor Retkliff razvedka xodimlarining prezident administratsiya milliy xavfsizlik sohasidagi ustuvor yo‘nalishlariga muvofiq kelishini ta’minlash uchun tezkor choralar ko‘rmoqda”, deydi u.
Xizmat vakillari bu qadamni “idoraga yangi kuch-g‘ayrat bag‘ishlashga” qaratilgan strategiyaning tarkibiy qismi deb baholamoqda.
♦ Trampning inauguratsiyasidan so‘ng AQSH prezidenti administratsiyasida milliarder Ilon Mask boshchiligidagi Davlat samaradorligi departamenti (DOGE) ish boshladi. Ushbu tuzilma ortiqcha me’yoriy hujjatlarni yo‘q qilish, amaldorlar va xarajatlarni qisqartirishga e’tibor qaratishi aytilgandi.
♦ The Wall Street Journal ma’lumotlariga ko‘ra, Tramp administratsiyasi kompensatsiya evaziga ishdan bo‘shatish taklifi hozircha davlat xizmatchilari orasida katta qiziqish uyg‘otmagan.
AQSH hukumatining 20 mingdan ortiq federal amaldorlari (davlat xizmatchilarining taxminan 1 foizi) o‘z lavozimlarini tark etishga rozi, deb yozadi Bloomberg.
Izoh (0)