Shavkat Mirziyoyev Orxus konvensiyasiga O‘zbekistonning qo‘shilishi to‘g‘risidagi qonunni imzoladi.
Mazkur qonun Qonunchilik palatasi tomonidan 11-dekabrda qabul qilinib, Senat tomonidan 22-fevralda ma’qullangandi.
U davlat organlari va tashkilotlari tomonidan atrof-muhitning havo, atmosfera, suv va tuproq kabi unsurlari to‘g‘risida zarur axborotni keng jamoatchilik talabiga binoan taqdim etishni, sohani rivojlantirishga qaratilgan dastur va rejalarni ishlab chiqishda jamoatchilik ishtirokini taʼminlashni belgilaydi.
O‘zbekistonning mazkur Konvensiyaga qo‘shilishi ekologiya va atrof-muhitni muhofaza qilish sohasida inson huquq va erkinliklarini munosib himoya qilishni taʼminlash, ekologik xavfsizlikka erishish bo‘yicha xorijiy hamkor davlatlar bilan birgalikdagi saʼy-harakatlarni amalga oshirish, shuningdek, mamlakatning xalqaro maydondagi nufuzini yanada yuksaltirishga xizmat qiladi.
Orxus konvensiyasi haqida
Orxus konvensiyasi BMTning Yevropa Iqtisodiy komissiyasining “Axborotdan foydalanish , qarorlar qabul qilishda jamoatchilik ishtiroki va atrof-muhit masalalarida adolatli suddan foydalanish to‘g‘risida”gi konvensiyasidir.
Konvensiya 1998-yil 25-iyunda Daniyaning Orxus shahrida Yevropa atrof-muhit vazirlarining 4-konferensiyasida 38 davlat tomonidan imzolangan. Orxus konvensiyasi mahalliy, milliy va transchegaraviy muhitga taalluqli masalalar bo‘yicha hukumat qarorlarini qabul qilish jarayonlarida axborotdan foydalanish, jamoatchilik ishtirok huquqini beradi. U jamoatchilik va davlat hokimiyati organlari o‘rtasidagi o‘zaro munosabatlarni rivojlantirishga qaratilgan.
Orxus konvensiyasining a’zolar bilan 2023-yil iyun oyida O‘zbekistonning Orxus konvensiyasiga qo‘shilishi masalasi muhokama qilingan edi. Konvensiyaga Markaziy Osiyodan Qozog‘iston, Qirg‘iziston, Tojikiston va Turkmaniston allaqachon a’zo bo‘lgan.
Izoh (0)