Prezident Shavkat Mirziyoyevning Fransiyaga tarixiy davlat tashrifining tadbirlarga boy dasturi yakuniga yetdi. Bu haqda Prezident matbuot xizmati xabar berdi.
Davlat rahbari Parij shahrida Fransiya prezidenti Emmanuel Makron bilan samarali muzokaralar o‘tkazdi.
Sammit yakunida Strategik sheriklik munosabatlarini o‘rnatish to‘g‘risida qo‘shma deklaratsiya, shuningdek, hamkorlikning turli yo‘nalishlari bo‘yicha bitimlarning salmoqli to‘plami qabul qilindi.
Prezident Fransiyaning yetakchi kompaniya, bank va tashkilotlari rahbarlari bilan davra suhbatida ishtirok etdi. Umumiy qiymati 6,5 milliard yevro bo‘lgan aniq kooperatsiya loyihalarini amalga oshirishni nazarda tutuvchi Investitsiya va innovatsiya sohalarida hamkorlik dasturi qabul qilindi.
Ikki tomonlama hamkorlikni rivojlantirishga qo‘shgan salmoqli hissasi uchun O‘zbekiston prezidenti Fransiyaning oliy mukofoti - Faxriy legion ordeni bilan taqdirlandi.
Tashrif doirasida Fransiya Milliy majlisi Raisi Yael Braun-Pive va Parij shahri meri Ann Idalgo bilan uchrashuvlar o‘tkazildi. Parij shahri ko‘chalaridan biriga Samarqand nomini berishga bag‘ishlangan marosim bo‘ldi.
YUNESKO Bosh direktori Odri Azule bilan muzokaralarda hamkorlikni yanada rivojlantirish istiqbollari hamda tashkilot Bosh konferensiyasining Samarqand shahridagi 43-sessiyasiga tayyorgarlik ko‘rish masalalari muhokama qilindi.
Tashrif tadbirlari yakunlangach, “Orli” xalqaro aeroportida davlat rahbarini Fransiya sport va yoshlar vaziri Mari Barsak va boshqa rasmiy shaxslar kuzatib qo‘ydi.
Davlat rahbari Toshkentga jo‘nab ketdi.
Izoh (0)