“G‘ishtko‘prik” chegara bojxona postida gashish giyohvandlik vositasi fosh etildi. Bu haqda Toshkent viloyati bojxona boshqarmasi xabar berdi.
Maʼlum qilinishicha, post orqali fuqaro boshqaruvida harakatlangan avtomashina bojxona ko‘rigidan o‘tkazilganida orqa eshik ichki qoplamasida xufiyona yashirib joylashtirilgan, 1 dona zarli qog‘oz o‘ramida 529 gramm gashish giyohvandlik vositasi fosh etildi.
Hozirda holat yuzasidan bojxona organlari tomonidan tergovga qadar tekshiruv harakatlari olib borilmoqda.
Maʼlumot uchun, 2024-yilning o‘tgan davr mobaynida 78 ta holatda 75 kgdan ziyod giyohvandlik vositalarining noqonuniy aylanmasiga chek qo‘yildi.
Giyohvand moddalar savdosi
2024-yilning mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)