HAMAS harakati G‘azo sektorini boshqarishni Falastin milliy ma’muriyatiga topshirishga tayyor. Bu haqda manbaga tayanib, Sky News Arabia xabar berdi.
Ma’lum qilinishicha, HAMAS tegishli qarorni Qohiradagi muzokaralar davomida Misr bosimi ostida qabul qilgan. Tegishli qaror haqida Falastin Ozodlik Tashkiloti rahbariyatiga maktub yo‘llangan. HAMAS bu borada o‘z shartlarini ham qo‘ygan. Jumladan, ularning barcha davlat xizmatchilari yangi ma’muriyat tarkibiga kiritilishi va ularga pensiya to‘lovi kafolatlanishi kerak.
Isroil mudofaa vaziri Israel Kats avvalroq mamlakat “o‘z mavjudligini xavf ostiga qo‘yishi mumkin bo‘lgan” Falastin davlatining tashkil etilishiga yo‘l qo‘ymasligini aytgandi. AQSH maxsus vakili Stiv Vitkoffning so‘zlariga ko‘ra, G‘azo sektorida o‘t ochishni to‘xtatishning ikkinchi bosqichi va garovga olingan isroilliklarni falastinlik mahbuslarga almashish bo‘yicha muzokaralar shu hafta davom etadi. Muzokaralarning ikkinchi bosqichi tirik qolgan barcha isroillik mahbuslarni ozod qilishni o‘z ichiga oladi.
Tramp: “AQSH G‘azo sektorini boshqaradi”
AQSH prezidenti G‘azo sektorini “snos” maydonchasi deb atagandi. U anklav aholisini turli mamlakatlarga, jumladan, Iordaniya va Misrga ko‘chirib o‘tkazish mumkinligini aytgan. U Qo‘shma Shtatlar bu jarayonni moliyalashtirmasligi, chunki xarajatlarni qoplashga Yaqin Sharq davlatlarining qurbi yetishini ta’kidlagandi. Vashington esa mintaqadagi ishlar uchun javobgar bo‘ladi va zarurat tug‘ilganda u yerga o‘z qo‘shinlarini yuborishi mumkinligini aytgan.
Ushbu taklifga javoban arab davlatlari yetakchilari AQSH davlat kotibiga maktub yo‘llab, falastinliklarni chiqarib yuborishga yo‘l qo‘yib bo‘lmasligi, buni nafaqat xalqaro huquqning buzilishi, balki mintaqaviy xavfsizlikka tahdid deb atagan. Iordaniya qiroli Abdulla II AQSH prezidenti Donald Tramp bilan uchrashuvda G‘azo sektoridan 2 ming nafar bolani olib ketishini bildirgan.
Izoh (0)