Shavkat Mirziyoyev Fransiya parlamenti quyi palatasi rahbari bilan uchrashuv o‘tkazdi

Shavkat Mirziyoyev 13-mart kuni Parijdagi Burbon saroyida Fransiya Milliy majlisi raisi Yael Braun-Pive bilan uchrashuv o‘tkazdi.

Prezident matbuot xizmatining xabar qilishicha, ikki davlat o‘rtasidagi parlamentlararo almashinuvni yanada kengaytirish masalalari ko‘rib chiqildi. Ushbu tashrifning tarixiy ahamiyati, O‘zbekiston va Fransiya o‘rtasida strategik sheriklik munosabatlari o‘rnatilgani mamnuniyat bilan qayd etildi.

Fransiya parlamenti quyi palatasi rahbari Yangi O‘zbekistonda amalga oshirilayotgan demokratik yangilanishlar, vakillik organlari rolini, xotin-qizlar, bolalar, yoshlar va nogironligi bo‘lgan shaxslar huquqlari, ekologik xavfsizlikni ta’minlashning kafolatlarini kuchaytirish borasidagi ishlarni yuqori baholadi.

O‘zbekiston—Fransiya parlamentlararo forumini tashkil etish va “yo‘l xaritasi” asosida do‘stlik guruhlari ishini qayta tiklash masalalari muhokama qilindi.

O‘zbekiston yetakchisi Milliy majlis Raisini joriy yil aprel oyida Toshkent shahrida bo‘lib o‘tadigan Parlamentlararo ittifoqning 150-yubiley assambleyasida ishtirok etish uchun O‘zbekistonga taklif etdi.

Uchrashuv yakunida O‘zbekiston prezidenti Faxriy mehmonlar kitobida qayd yozib qoldirdi.

Shavkat Mirziyoyevning Fransiyaga tashrifi haqida

O‘zbekiston prezidenti 11-fevral kuni Fransiya prezidenti Emmanuel Makronning taklifiga binoan davlat tashrifi bilan Parij shahriga keldi. 12–mart kuni Shavkat Mirziyoyevni rasmiy kutib olish marosimi bo‘libdi o‘tdi. So‘ng Yelisey saroyida Shavkat Mirziyoyev va Emmanuel Makron muzokaralar o‘tkazdi. Unda davlat rahbarlari ikki mamlakat o‘rtasida strategik sheriklik munosabatlarini o‘rnatish to‘g‘risida tarixiy qarorga keldi.

Muzokaralar yakunida prezidentlar Strategik sheriklik o‘rnatish to‘g‘risidagi qo‘shma deklaratsiyani qabul qildi. Davlat rahbarlari huzurida Mutaxassislar va talabalar harakatchanligi to‘g‘risidagi hukumatlararo bitim almashildi. Shuningdek, bir qator bitimlar imzolandi.

Yelisey saroyidagi oliy darajadagi uchrashuv chog‘ida Shavkat Mirziyoyev Emmanuel Makronga fransuz yozuvchisi Viktor Gyugoning o‘zbek tiliga tarjima qilingan “Kulayotgan odam” romanining ilk nusxasini sovg‘a qildi. Ushbu kitob ommaviy nashrdan chiqishi va tez orada kitobxonlar eʼtiboriga havola etilishi kutilmoqda.

Tashrif davomida O‘zbekiston prezidenti Shavkat Mirziyoyev Fransiyaning oliy mukofoti — Faxriy legion ordeni bilan mukofotlandi. Fransiyada ushbu orden alohida xizmatlarning davlat darajasida e’tirof etilishi va shon-sharafning eng yuqori belgisi hisoblanadi.

Parijga tashrif davomida Shavkat Mirziyoyev Fransiya ishbilarmon doiralarining yetakchi vakillari bilan uchrashuv ham o‘tkazdi. O‘zbekiston prezidenti Fransiya bilan savdo-iqtisodiy aloqalarni yanada kengaytirish muhimligini ta’kidladi. Fransiya kompaniyalari bilan 2027-yilgacha bo‘lgan davrga mo‘ljallangan innovatsion va sanoat kooperatsiyasi dasturi bunga xizmat qiladi. Unga umumiy qiymati 6,5 milliard yevro bo‘lgan aniq yo‘nalish va loyihalar kiritilgan.

Emmanuel Makron Yelisey saroyida O‘zbekiston prezidenti Shavkat Mirziyoyev sharafiga davlat qabul marosimini uyushtirdi. Unda kki mamlakat rasmiy delegatsiyalari, Fransiya bosh vaziri Fransua Bayru boshchiligida Vazirlar Mahkamasi a’zolari, taniqli madaniyat, san’at va fan arboblari, ishbilarmon doiralar va jamoatchilik vakillari ishtirok etdi.

Shavkat Mirziyoyev Fransiya parlamenti quyi palatasi rahbari bilan uchrashuv o‘tkazdi

Mavzuga doir

Izoh (0)

Daryo.uz | Sizning muammoingiz yechimi