Qirg‘iziston prezidenti Sadir Japarov Markaziy Osiyo mamlakatlariga o‘zaro vizasiz rejim, boshqa davlatlardan kelgan mehmonlar uchun esa yagona viza joriy etishni taklif etdi. Bu haqda u ijtimoiy tarmoqda Tojikiston bilan imzolangan davlat chegarasi to‘g‘risidagi shartnomaga izoh chekish davomida shunday fikr bildirgan.
“Bugun Qirg‘iziston va Tojikiston o‘rtasidagi 101-yil davomida (1924-yildan beri) hal etilmagan chegara masalasi uzil-kesil yechimini topdi.
Bu nafaqat ikki mamlakat, balki butun Markaziy Osiyo mintaqasi uchun ulkan voqea, chunki endi mintaqaning barcha davlatlari o‘zaro chegara masalalarini to‘liq hal qildi, deyish mumkin. Shu paytdan boshlab Markaziy Osiyoda abadiy tinchlik qaror topdi.
Endi Markaziy Osiyo mamlakatlari o‘zaro vizasiz rejim joriy etish, boshqa davlatlardan kelgan mehmonlar uchun esa Shengen vizasiga o‘xshash, mintaqaning barcha mamlakatlarida erkin harakatlanish imkonini beruvchi yagona viza tizimini yo‘lga qo‘yish jarayonini boshlashlari lozim”, deydi Japarov.
13-mart kuni Qirg‘iziston prezidenti Sadir Japarov va Tojikiston prezidenti Emomali Rahmon ikki mamlakat o‘rtasidagi Davlat chegarasi to‘g‘risidagi bitimni imzoladi.
Qirg‘iziston—Tojikiston chegarasining umumiy uzunligi 1 ming 6,84 kilometrni tashkil etadi, shundan 519,9 kilometri 2011-yilgacha, 486,94 kilometri esa so‘nggi uch yil ichida aniqlangan. O‘nlab bahsli uchastkalar tufayli u yerda vaqti-vaqti bilan qurolli to‘qnashuvlar yuz berib turardi.
Izoh (0)