13-mart kuni dunyoning yettilik guruhi davlatlari tashqi ishlar vazirlari va AQSH prezidenti Donald Tramp Kanadada uchrashadi. Uchrashuvda Ukrainaga nisbatan yangilanayotgan tashqi siyosat masalalari muhokama qilinadi. Bu haqda Reuters xabar berdi.
Ma’lumot o‘rnida, G7 davlatlariga Buyuk Britaniya, Kanada, Fransiya, Germaniya, Italiya, Yaponiya va Amerika kiradi. Mamlakatlarning tashqi ishlar vazirlari guruhi Yevropa ittifoqi bilan birgalikda Kvebek tog‘larida joylashgan La Malbaie chekka sayyohlik shaharchasida ikki kunlik uchrashuvlarda ishtirok etadi.
Uchrashuvning eng muhim masalasi AQSH davlat kotibi Marko Rubioning Saudiya Arabistonining Jidda shahrida Kiyev bilan o‘tkazgan muzokaralari bo‘ladi. Unda Ukraina 30 kunlik o‘t ochishni to‘xtatish kelishuvini qo‘llab-quvvatlashga tayyor ekanligini bildirgan.
G7 vazirlari Jiddadagi ijobiy natija hech bo‘lmaganda Ukraina bo‘yicha muzokaralarni osonlashtirishi mumkinligini aytdi. Bu mamlakatlarning Ukrainaga nisbatan tashqi siyosatlarini yangilashga yo‘l ochadi.
Biroq Kanadaning raisligidagi birinchi G7 yig‘ilishi yakuniy bayonotni tasdiqlashi murakkab kechmoqda. Bunga AQSHning barcha po‘lat va alyuminiy importiga 25 foizlik bojlar joriy etish to‘g‘risidagi qarori hamda Kanada va Yevropa ittifoqining javob choralarini e’lon qilishi sabab bo‘lmoqda. Bu holat mamlakatlar o‘rtasidagi munosabatni chigallashtirgan.
Amerika Qo‘shma Shtatlari prezidenti Donald Tramp lavozimga qaytganidan beri Ukrainaga nisbatan kamroq do‘stona munosabatda bo‘lib, urushni tezroq tugatish bo‘yicha kelishuvga erishishni talab qilmoqda. Bundan tashqari, Amerika va Rossiya aloqalarini iliqlashtirishga erishdi.
Ammo hozirda Kanada va AQSH munosabatlari yomonlashgan. Bunga Trampning Kanadadan barcha importlarga bojlar joriy etish tahdidlari va uni AQSHning 51-shtatga aylantirish g‘oyasi sabab bo‘lgan.
Biz muzokaralarda G7 davlatlarining barchasiga e’tibor qaratamiz. Bu biz Kanadani qanday egallab olishimiz haqidagi uchrashuv emas, dedi AQSH davlat kotibi Marko Rubio jurnalistlarga.
Kanada tashqi ishlar vaziri Melani Joli bu javobdan qoniqmadi:
Men har bir uchrashuvda yevropaliklar bilan AQSHga javob bojlarini muvofiqlashtirish va amerikaliklarga bosim o‘tkazish masalalarini ko‘taraman, dedi u.
Muzokaralar ikki kun davom etishi belgilangan.
Izoh (0)