Pokiston hukumati mamlakat hududida bo‘lgan barcha noqonuniy afg‘on muhojirlarini mamlakatdan chiqarib yubormoqchi. Bu haqda Afg‘onistonning Islomoboddagi elchixonasi xabar berdi.
Xabarga ko‘ra, Pokiston poytaxti Islomobod va Ravalpindi shaharlarida so‘nggi paytlarda afg‘on fuqarolari qo‘lga olinib, tintuv qilinmoqda va bu ikki shahardan chiqib ketish bo‘yicha ko‘rsatma berilgan.
Afg‘oniston fuqarolarini qo‘lga olish jarayoni hech qanday rasmiy xabarnomalarsiz amalga oshirilmoqda. Afg‘onistonning Islomoboddagi elchixonasi yozishmalar orqali hech qanday rasmiy xabar olmagan, deyiladi xabarda.
Qayd etilishicha, Afg‘oniston elchixonasi vakillari ushbu xatti-harakatlar “yakka hodisalar” yoki “ochiq e’lon qilinishi kerak bo‘lgan rasmiy siyosatning bir qismi” ekanligini aniqlash uchun Pokiston rasmiylari bilan bir necha bor uchrashuvlar o‘tkazgan. Diplomatik vakolatxona, shuningdek, Birlashgan Millatlar Tashkilotining Qochoqlar bo‘yicha Oliy komissari boshqarmasi (UNHCR) bu jarayondan xabardor emasligini ta’kidladi.
Yakunda Pokiston TIV vakillari nafaqat Islomobod va Ravalpindidan, balki yaqin kelajakda butun mamlakatdan barcha afg‘on qochqinlarini deportatsiya qilish bo‘yicha aniq va yakuniy reja mavjudligini tasdiqladi, deyiladi xabarda.
Shu bilan birga, Pokiston rasmiylari ushbu tashabbuslar hukumatning rasmiy qarori ekanligini ma’lum qildi. Rasmiylarga ko‘ra, amaldagi vizalarga ega bo‘lgan afg‘onlarga Islomobod va Ravalpindida yashashga ruxsat beriladi.
Ma’lum qilinishicha, elchixona Afg‘oniston fuqarolarini mamlakatga munosib qaytarish masalasi ustida ishlamoqda, shuningdek, o‘z hukumatini yuzaga kelgan vaziyat haqida xabardor qilgan.
Repatriatsiya 2023-yil oktyabr oyida boshlangan
BMT Qochqinlar bo‘yicha oliy komissari boshqarmasi ma’lumotlariga ko‘ra, Pokistonda 1 million 340 mingga yaqin afg‘on qochqinlari va 468 800 nafar noqonuniy afg‘on muhojirlari bor. 2023-yildan buyon 820 mingdan ortiq afg‘on qochqinlari o‘z vataniga qaytdi.
2021-yil avgust oyida Afg‘onistonda hokimiyat almashganidan so‘ng Kobul va Islomobod o‘rtasida asosan xavfsizlik bilan bog‘liq kelishmovchiliklar yuzaga keldi.
Xususan, Islomobod ma’muriyati Kobulni Pokistonning “Tehrik-e Tolibon” (TTP) jangarilariga nisbatan harakatsizlikda ayblamoqda, Afg‘oniston ma’muriyati esa Islomobodning bu ayblovlarini rad etib, buni Kobulning Pokistondagi xavfsizlik muammolariga hech qanday aloqasi yo‘qligi bilan izohlamoqda.
Ma’lum qilinishicha, Pokistonning noqonuniy muhojirlarni jo‘natish to‘g‘risidagi qarori Afg‘oniston ma’muriyatiga siyosiy bosim va mamlakat iqtisodiyoti uchun salbiy oqibatlar ta’sirida qabul qilingan.
Izoh (0)