Афғонистон аҳолисининг ярмидан кўпи — қарийб 23 миллион киши инсонпарварлик ёрдамига муҳтож. Бу ҳақда БМТ бош котибининг махсус вакили ва ташкилотнинг Афғонистонга кўмак миссияси раҳбари Роза Отунбаева Хавфсизлик кенгаши йиғилишида маълум қилган.
Таъкидланишича, Афғонистон йиллар давомида олиб борилган урушлар, чуқур илдиз отган қашшоқлик, иқлим ўзгаришлари, аҳоли сонининг ўсиши, айниқса, аёллар ва қизлар учун кучайиб бораётган хавф-хатарлар туфайли жиддий инсонпарварлик инқирозини бошдан кечирмоқда.
“Инсонпарварлик ёрдамини молиялаштиришнинг камайиши афғон халқига жиддий таъсир кўрсатмоқда ва бу таъсир давом этади. Сўнгги бир ойда 200 дан ортиқ тиббиёт муассасаси ёпилди, бу 1,8 миллион атрофидаги одамга таъсир қилди. Болалар тўйиб овқатланмаслигини даволаш бўйича ҳаётий муҳим хизматларни кўрсатиш чекланган, ҳамкор ташкилотлар ўз фаолияти ва мувофиқлаштириш имкониятларини сезиларли даражада камайтирган”, дейди Роза Отунбаева.
Йиғилишда “Толибон” ҳаракати халқаро мажбуриятларнинг баъзиларини мамлакат суверенитетига тажовуз қилиш ёки унинг анъаналарига мос келмаслик баҳонасида рад этаётгани афсусланарли эканлиги билдирилган.
Отунбаеванинг сўзларига кўра, кўплаб афғонлар Миссияга мурожаат қилиб, амалдаги ҳокимиятнинг фуқаролар шахсий ҳаётига аралашувидан норозилик билдирган.
Аввалроқ “Толибон” аёлларнинг жамоавий намоз ўқиш учун масжидга киришини тақиқлагани ҳақида хабар берилганди.
Изоҳ (0)