Afg‘oniston poytaxti Kobulda xudkush terrorchining portlovchi moslamasi hukumat binosi yaqinida ishga tushdi. Oqibatda bir kishi halok bo‘ldi, yana uch kishi yaralandi. Bu haqda Al Jazeera xabar berdi.
Xudkush 13-fevral kuni Shaharsozlik va uy-joy qurilishi vazirligi binosiga kirishga uringan, biroq xavfsizlik kuchlari tomonidan nishonga olingan. U nishonga olinganidan keyin portlovchi qurilmasi ishga tushgan. Oqibatda xavfsizlik xizmatining bir nafar xodimi halok bo‘lgan.
Jarohatlanganlar esa portlashdan keyin davolanish uchun muassasaga olib ketilgan. Hujum uchun javobgarlikni hech bir guruh o‘z zimmasiga olmagan. Hozirda holat yuzasidan tergov ishlari olib borilmoqda.
Hujum shaharning gavjum qismiga qaratilgan bo‘lib, u yerda hukumat idoralari, shuningdek, xorijiy elchixonalar, jumladan, 2021-yilda Amerika va NATO xorijiy kuchlari mamlakatni tark etganidan beri bo‘sh qolgan AQSH elchixonasi joylashgan.
“Tolibon” 2021-yilda mamlakatni egallab oldi va urushdan vayron bo‘lgan Afg‘onistonda xavfsizlikni tiklashini aytdi. Ammo hujumlar davom etmoqda, ularning aksariyati mahalliy ISHID jangarilari tomonidan amalga oshirilmoqda.
Bu 11-fevral kuni Afg‘oniston shimoli-sharqidagi bank oldida xudkush terrorchi o‘z tanasiga bog‘langan portlovchi moddalarni portlatib, kamida besh kishining o‘limiga sabab bo‘lganidan keyingi ikkinchi teraktdir.
Izoh (0)